دہلی انتخابات: بدرپور سے بی ایس پی امیدوار پر نامعلوم افراد کا حملہ، مایاوتی نے مذمت کی

نئی دہلی: دہلی کی بدرپور اسمبلی سیٹ سے عام آدمی پارٹی (عآپ) کے ممبر اسمبلی اور اس بار انتخابات میں بہوجن سماج پارٹی (بی ایس پی) کے امیدوار نارائن دت شرما پر جمعرات کی رات تین نامعلوم افراد نے مبینہ طور پر حملہ کیا۔ بی ایس پی سربراہ مایاوتی شرما پر حملے کی مذمت کرتے ہوئے الیکشن کمیشن اور پولیس سے قصورواروں کے خلاف سخت کارروائی کا مطالبہ کیا ہے۔ پولیس نے آج بتایا کہ شرما پر تین لوگوں نے لاٹھی سے حملہ کیا جس میں وہ زخمی ہو گئے ہیں۔

شرما سال 2015 کے اسمبلی انتخابات میں عآپ کے ٹکٹ پر بدرپور سے منتخب ہوئے تھے۔ پارٹی نے اس بار انہیں ٹکٹ نہیں دیا۔ عآپ نے اس بار کانگریس سے آئے رام سنگھ نیتا جی کو امیدوار بنایا ہے۔ ٹکٹ نہ ملنے سے ناراض ہو کر نارائن دت شرما بی ایس پی کے ٹکٹ پر الیکشن لڑ رہے ہیں۔

مایاوتی نے بھی نارائن دت شرما پر حملے کی مذمت کرتے ہوئے ٹوئٹر پر لکھا، "بدرپور سے بی ایس پی امیدوار نارائن دت دت شرما پر کل رات میں کیا گیا جان لیوا حملہ انتہائی شرمناک اور قابل مذمت ہے۔" انہوں نے کہا الیکشن کمیشن اور پولیس انتظامیہ کو اس کا فوری طور پر سنجیدگی سے نوٹس لینا چاہیے اور قصورواروں کے خلاف سخت قانونی کارروائی کرنے کا مطالبہ کیا ہے۔ انہوں نے بدرپور علاقے کے بی ایس پی کارکنوں سے اپیل کی ہے کہ وہ اس حملے کا منہ توڑ جواب دینے کے لئے اپنے یہاں پارٹی کے امیدوار کو جتانے کے لئے اپنی پوری طاقت لگا دیں۔

پولیس کے مطابق نارائن دت شرما پر حملہ اس وقت کیا گیا جب وہ اپنے حامیوں کے ساتھ بدرپور میں میٹنگ کرکے گھر واپس آ رہے تھے۔ رات تقریباً ایک بجے ہوئے اس حملے میں تین نامعلوم افراد نے شرما کی گاڑی کو روک کر ان کی پٹائی کر دی۔ نارائن دت شرما پر حملہ کرنے والے ابھی تک پولیس کی گرفت سے باہر ہیں۔