دہلی: جیت پور اور مدن پور کھادر میں انہدامی کارروائی کا اندیشہ، لوگوں میں خوف

جنوبی دہلی میونسپل کارپوریش کے کمشنر آج سریتا وہار، جیت پور اور مدن پور کھادر کے علاقوں میں ان غیر قانونی بلڈنگوں کا سروے کریں گے جن پر کارپوریشن نے نوٹس چسپاں کئے ہوئے ہیں۔ اس قدم کو لے کر علاقہ کے لوگوں میں زبردست خوف ہے۔

جنوبی دہلی میونسپل کارپوریشن کے میئر مکیش سوریان کے مطابق کارپوریشن نے غیر قانونی تجاوذات کے خلاف پوری مہم چلانے کی تیاری کی ہوئی ہے۔ اس تعلق سے افسران کو مطلع کر دیا گیا ہے۔ ایک خبر کے مطابق یہ کارروائی صبح 11 بجے سے شروع ہو سکتی ہے۔ سریتا وہار، مدن پور کھادر اور جیت پور کے کونسلروں کو مطلع کر دیا گیا ہے۔ واضح رہے کملیش کمار شکلا جیت پور، نیتو سریتا وہار اور سنتوش دیوی مدن پور کھادر سے کونسلر ہیں۔ کونسلروں سے جنوبی دہلی میونسپل کارپوریشن کے میئر اور کمشنر کی سروے میں مدد کے لئے کہا گیا ہے۔

میئر نے کہا کہ ان کے پاس غیر قانونی تجاوزات کو ہٹانے کے لئے پورا منصوبہ ہے اور اس تعلق سے تمام افسران اور پولیس کو مطلع کر دیا گیا ہے۔ انہوں نے بتایا کہ ناجائز تجاوزات کے لئے کسی نوٹس کی ضرورت نہیں ہوتی، لیکن غیر قانون طور پر تعمیر کی گئی بلڈنگوں کو نوٹس دیا دیا جاتا ہے اور وہ دیا جا چکا ہے۔

کانگریس کے کونسلر ابھیشیک دت نے جنوبی دہلی میونسپل کارپوریشن کی انہدامی مہم کے تعلق سے سوال کیا کہ یہ انہدامی کارروائی پوری دہلی کے لئے ہے یا یہ صرف اس علا قہ کے لئے ہے۔ انہوں نے امید ظاہر کی ہے کہ یہ مہم غریبوں کے خلاف نہیں ہو گی، بلکہ سینک فارم میں بھی چلے گی، جہاں غیر قانونی طور پر فارم ہاؤس تعمیر کئے گئے ہیں۔ انہوں نے کہا کہ میئر کو غریبوں کو اپنا نشانہ نہیں بنانا چاہئے۔

بی جے پی ان غیر قانونی تعمیرات کے لئے عام آدمی پارٹی کو ذمہ دار مانتی ہے، جبکہ کانگریس کے سینیئر رہنما اور سابق وزیر اجے ماکن کا کہنا ہے کہ یہ کارروائی صرف مہنگائی اور بے روزگاری جیسے بنیادی مدوں سے توجہ ہٹانے کے لئے ہے۔ انہوں نے کہا کہ غریب کی تجاوزات ضرورت کی بنیاد پر ہوتی ہیں، جبکہ امیر کی تجاوذات کی بنیاد لالچ ہوتی ہے، اس لئے حکومت کو کسی بھی کارروائی سے پہلے اس پہلو کو ذہن میں رکھنا چاہئے۔