دہلی کانگریس صدر اروندر سنگھ لولی کی ایما پر 14 اضلاع میں ماسک تقسیم

دہلی پردیش کانگریس کمیٹی کے صدر اروندر سنگھ لولی کے ایما پر دہلی میں روز بروز بڑھ رہی فضائی آلودگی کے پیش نظر کانگریس کی جانب سے دہلی کے 14 اضلاع کے میں آلودگی سے بچنے کے لئے ماسک تقسیم کئے جارہے ہیں۔آج سیلم پور اسمبلی حلقہ کے برہم پوری روڈ پر بابر پور ضلع کانگریس کمیٹی کے صدر چودھری زبیر احمد نے اپنی ٹیم کے ہمراہ ماسک تقسیم کئے اور گزارش بھی کی کہ دہلی میں فضائی آلودگی کا گراف کافی بڑھ گیا ہے اس لئے ماسک کا استعمال کریں، خصوصا سانس کے مریضوں اور ضعیفوں کو بہت احتیاط کی ضرورت ہے۔

چودھری زبیر احمد نے کہا کہ فضائی آلودگی بہت ہی خطر ناک ہوتی ہے جو سانس کے ذریعہ پھیپھڑوں پر اثرانداز ہوتی جس سے بچنے کا واحد طریقہ ہے کہ باہر کم سے کم نکلا جائے،پارکوں اور ہرے بھرے علاقوں میں زیادہ وقت دیا جائے اور باہر بھیڑ بھاڑ علاقوں میں ماسک لگا کر رکھا جائے۔چونکہ کانگریس پارٹی ہمیشہ لوگوں کے ساتھ خیر خواہی کا جذبہ رکھتی ہے اور عوام کے سہولیات کا خیال رکھتی ہے۔اسی کے تحت دہلی پردیش کانگریس کمیٹی کے صدر اروندر سنگھ لولی کی رہنمائی میں ہم سب ماسک تقسیم کررہے ہیں۔

دہلی پردیش کانگریس کمیٹی کے ڈیلی گیٹ سید ناصر جاوید نے کہا کہ دہلی پردیش کانگریس کمیٹی کی ایک آواز پر بابر پور ضلع کانگریس کمیٹی چودھری زبیر احمد کی صدارت میں ہر محاذ پر کھڑی ہوئی نظر آتی ہے اور آج بھی ایک آواز پر فضائی آلودگی سے بچانے کے لئے لوگوں میں ماسک تقسیم کررہی ہے اور یہ سلسلہ آگے بھی جاری رہے گا۔انہوں نے کہاکہ فضائی آلودگی سے دہلی کے عوام سخت پریشان ہیں اورحالات دن بہ دن دگر گوں ہوتے جارہے ہیں ، اور لوگ سابق وزیر اعلی آنجہانی شیلا دیکشت جی کے دور حکومت والی دہلی کو یاد کر رہے ہیں جہاں ہر مسائل کا فوری طور پر حل نکالا جاتا تھا۔ اس موقع پر خالد خان،ضرار احمد،آشیش شرما،شاداب حسن،نوین شرما،اشتیاق شیخ،فہیم خان،ندیم راعین، ضرارصدیقی،نواب الدین،ونو د پردھان،محمد عامر اور ابو بھائی بطور خاص موجود رہے۔