دہلی ایمس کے ڈائریکٹر ڈاکٹر گلیریا کی مدت کار میں توسیع
یہ حکم انسٹی ٹیوٹ کے صدر اور مرکزی وزیر صحت منسکھ منڈاویہ نے ڈاکٹر گلیریا کی پانچ سالہ میعاد ختم ہونے سے دو دن پہلے جاری کیا۔ وہ 24 مارچ کو ریٹائر ہونے والے تھے۔
نئی دہلی: آل انڈیا انسٹی ٹیوٹ آف میڈیکل سائنسز (ایمس) دہلی کے ڈائریکٹر رندیپ گلیریا کی میعاد تین ماہ اور نئے ڈائریکٹر کی تقرری تک بڑھا دی گئی ہے۔ یہ اطلاع بدھ کو ایک سرکاری حکم نامے میں دی گئی۔ یہ حکم انسٹی ٹیوٹ کے صدر اور مرکزی وزیر صحت منسکھ منڈاویہ نے ڈاکٹر گلیریا کی پانچ سالہ میعاد ختم ہونے سے دو دن پہلے جاری کیا۔ وہ 24 مارچ کو ریٹائر ہونے والے تھے۔
سرکاری اطلاعات کے مطابق ملک کے تقریباً تیس سے زیادہ بہترین ڈاکٹر اس باوقار عہدے کی دوڑ میں شامل ہیں، جن میں انڈین کونسل آف میڈیکل ریسرچ کے موجودہ ڈائریکٹر جنرل ڈاکٹر بلرام بھارگوا اور ہیلتھ سروسز کے ڈائریکٹر جنرل ڈاکٹر سنیل کمار شامل ہیں۔
اس عہدے کے لیے درخواست دینے والوں میں اس کے ہی بہترین ڈاکٹر شامل ہیں، جن میں ایمس ٹراما سینٹر چیئرمین ڈاکٹر رجنیش ملہوترا، پروفیسر اور اینڈو کرائنولوجی محکمہ کے سربراہ ڈاکٹر نکھل ٹنڈن اور نیورولوجی شعبے کے سربراہ ڈاکٹر ایم وی سریواستو شامل ہیں۔
وزارت صحت نے ایمس کے نئے ڈائریکٹر کی تقرری کے لیے چار رکنی سلیکشن کمیٹی تشکیل دی ہے۔ اس کمیٹی میں مرکزی صحت سکریٹری راجیش بھوشن، محکمہ بائیو ٹیکنالوجی کے سکریٹری راجیش ایس گوکھلے، مرکز کے پرنسپل سائنسی مشیر کے وجے راگھون اور دہلی یونیورسٹی کے وائس چانسلر یوگیش سنگھ شامل ہیں۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔