دہلی: سیلم پور اسمبلی حلقہ سے 7 کانگریس عہدیداران ایوارڈ سے سرفراز
چودھری متین احمد نے کہا کہ سیلم پور اسمبلی حلقہ میں کانگریس کا ایک ایک سپاہی اپنی پوری محنت اور لگن سے کام کرتا ہے جس کے نتیجے میں آج کچھ لوگوں کو ان کی محنت کو دیکھتے ہوئے ایوارڈ سے نوازا گیا ہے۔
![<div class="paragraphs"><p>تصویر محمد تسلیم</p></div>](https://media.assettype.com/qaumiawaz%2F2023-06%2F1d6e5a57-6726-4e38-8338-387ce3849e6c%2FMateen_Taslim__2_.jpeg?rect=99%2C0%2C1200%2C675&auto=format%2Ccompress&fmt=webp)
تصویر محمد تسلیم
نئی دہلی: سیلم پور اسمبلی حلقہ سے ساتھ کانگریس عہدیداران کو انڈین پیس اینڈ ہارمونی ایوارڈ سے سرفراز کیا گیا ہے۔ ایوارڈ یافتہ افراد میں بابر پور ضلع کانگریس کمیٹی کے نائب صدر خالد خان، سیلم پور یوتھ کانگریس صدر جرّار احمد، بابر پور ضلع کانگریس کمیٹی کے جنرل سکریٹری شفیق خان، بابر پور ضلع کانگریس کمیٹی کی جنرل سکریٹری کماری نیہا بگراج، دہلی پردیش خواتین کانگریس کمیٹی کی سکریٹری زیب النساء رانی، بابر پور ضلع کانگریس کمیٹی کے سکریٹری فہیم خان، سیلم پور یوتھ کانگریس کے محد توحید کے نام قابل ذکر ہیں۔ یہ ایوارڈ ساؤتھ انڈین سیل دہلی پردیش کانگریس کمیٹی کے چیئرمین راجیو جوسف کے ہاتھوں تقسیم کیے گئے۔
یہ بھی پڑھیں : اتراکھنڈ کے مسلمان نقل مکانی پر مجبور...سہیل انجم
ایوارڈ ملنے پر سابق ایم ایل اے اور کانگریس کے قدآور لیڈر چودھری متین احمد، بابر پور ضلع کانگریس کمیٹی کے صدر چودھری زبیر احمد اور ڈیلی گیٹ سید ناصر جاوید کی موجودگی میں سبھی ایوارڈ یافتگان کا پھولوں کا ہار پہنا کر پرتپاک استقبال کیا گیا۔ اس موقع پر خطاب کرتے ہوئے چودھری متین احمد نے کہا کہ سیلم پور اسمبلی حلقہ میں کانگریس کا ایک ایک سپاہی اپنی پوری محنت اور لگن سے کام کرتا ہے جس کے نتیجے میں آج کچھ لوگوں کو ان کی محنت کو دیکھتے ہوئے ایوارڈ سے نوازا گیا ہے جو بہت ہی خوشی کی بات ہے۔
چودھری متین احمد نے کہا کہ انسان حوصلا افزائی کا قائل ہوتا ہے اور جب کسی فرد کو اس کی محنت پر ایوارڈ سے نوازا جاتا ہے تو وہ دوگنی رفتار سے کام کرتا ہے۔ ہمیں اپنے منصوبوں کو دھیان میں رکھتے ہوئے روزآنہ کام کرتے رہنا چاہیے ہماری یہ محنت ایک دن رنگ ضرور لاتی ہے۔ انہوں نے کہا کہ راجیو جوسف نے دہلی کانگریس کے لیڈران و کارکنان کو ان کی محنت کے نتیجے میں انڈین پیس اینڈ ہارمونی ایوارڈ دینے کا جو سلسلہ شروع کیا ہے اس سے دہلی کانگریس کارکنان و لیڈران کے حوصلوں کو تقویت مل رہی ہے۔
بابر پور ضلع کانگریس کمیٹی کے صدر چودھری زبیر احمد نے سبھی عہدیداران کو مبارکباد دیتے ہوئے کہا کہ آج ضلع کے لیے بہت ہی خوشی کا دن ہے کہ ہمارے ضلع سے سات لوگوں کو انڈین پیس اینڈ ہارمونی ایوارڈ سے سرفراز کیا گیا ہے۔ انہوں نے کہا کہ پوری دہلی میں بابر پور ضلع کانگریس کا سب سے مضبوط ضلع ہے اور سب سے زیادہ کانگریس کی ممبر شپ بھی یہیں ہوئی ہے، یہ سب کانگریس کے مضبوط عہدیداران اور کارکنان کی کڑی محنت کا نتیجہ ہے۔
چودھری متین احمد نے کہا کہ بابر پور ضلع میں کانگریس پارٹی سے نوجوان بڑی تعداد میں منسلک ہو رہے ہیں اور اس طرح دہلی میں کانگریس کا کارواں بڑھتا جا رہا ہے۔ جس کے نتائج ہم سب نے ایم سی ڈی الیکشن میں دیکھیں ہیں۔ انہوں نے کہا کہ آنے والے انتخابات میں مزید بدلاؤ ہوں گے چونکہ لوگ دوسری سیاسی جماعتوں سے پریشان آچکے ہیں اور اپنے علاقے کی ترقی کے لئے کانگریس کو واپس لانا چاہتے ہیں۔
ڈیلی گیٹ سید ناصر جاوید نے کہا کہ نوجوان ہی تبدیلی لانے کا کام کرتے ہیں اور آج جن لوگوں کو ایوارڈ ملا ہے وہ سبھی نوجوان ہیں اور زمینی سطح پر دل و جان سے محنت کرتے ہیں ان کی اسی محنت کو دیکھتے ہوئے ایوارڈ سے نوازا گیا ہے۔ اہم شرکاء میں نفیس خان، آصف اقبال، آشیش شرما، مقبول بیگ، فہیم خان، صدام حسین، قاسم سیفی، نوید کے نام قابل ذکر ہیں۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔