راج ناتھ سنگھ کا پرویش ورما کو جواب، نفرت سے حاصل جیت قابل قبول نہیں

جب وزیر اعظم کپڑوں سے پہچاننے کی بات کہیں، وزیر داخلہ دہلی اسمبلی کے انتخابی نتائج کو شاہین باغ مظاہرہ کا جواب بتانے کی کوشش کریں، وزیر مملکت جب بی جے پی کی مخالفت کرنے والوں کو غداروں سے تعبیر کر کے گولی مارنے کے لئے اکسائیں، رکن پارلیمنٹ شاہین باغ کے پر امن مظاہرین کے تعلق سے کہیں کہ وہ قتل کریں گے اور بہو بیٹیوں کی عصمت لوٹیں گے، بی جے پی کا ایک امیدوار ووٹنگ کے دن کو ہندوستان بنام پاکستان مقابلہ بتائے، اس سارے ماحول میں اگر ملک کا وزیر دفاع یہ کہے کہ ان کی پارٹی کو نفرت پھیلا کر حاصل کی گئی جیت قبول نہیں، تو اس سے حکمراں جماعت میں تضاد بھی نظر آتا ہے اور امید بھی جاگتی ہے۔

وزیر دفاع راج ناتھ سنگھ نے دہلی کے آدرش نگر میں ایک انتخابی جلسہ سے خطاب کرتے ہوئے ملک کے مسلمانوں کو یقین دلانے کی کوشش کی ہے کہ نئے شہریت ترمیمی قانون سے ملک کے کسی بھی شہری کی شہریت متاثر نہیں ہوگی۔ انہوں نے کہا ’’ہم ایسی جیت نہیں چاہتے جو نفرت کی بنیاد پر حاصل کی گئی ہو۔ اگر ہم جیت بھی گئے تو بھی ہمیں ایسی جیت قبول نہیں۔‘‘ انہوں نے اپنے خطاب میں کہا کہ شاہین باغ میں نئے قانون کے خلاف مظاہرہ ہو رہا ہے اور کچھ لوگ مسلمانوں میں ان کی شہریت ختم ہونے کا خوف پھیلا رہے ہیں۔

اس وقت جب دہلی انتخابات میں شاہین باغ مرکزی مدا بن گیا ہے اور باقی تمام مدے پیچھے چھوٹ گئے ہیں اس وقت وزیر دفاع کا یہ کہنا کہ ’’مجھے نہیں معلوم کہ آپ ہمیں ووٹ دیں گے یا نہیں لیکن میری آپ سے ایک درخواست ہے کہ آپ ہماری نیت پر شک نہ کریں۔ ملک کے وزیر دفاع ہونے کی حیثیت سے میں آپ کو یقین دلاتا ہوں کہ ملک کا ہر مسلمان ہندوستانی شہری ہے۔ شہریت ختم ہونے کو بھول جائیں۔ میں یقین دلاتا ہوں کہ کسی بھی ہندوستانی مسلمان شہری کو چھو نہیں سکتا۔‘‘

لوگوں کا سوال ہے کہ وزیر دفاع کا بیان کیا بی جے پی کا نیا حربہ ہے یا وہ موجودہ ماحول سے ناراض ہیں۔ واضح رہے راج ناتھ سنگھ پارٹی کے قدآور رہنماؤں میں سے ایک ہیں اور جب وہ پارٹی کے صدر تھے اس وقت ہی نریندر مودی اقتدار میں آئے تھے لیکن اس کے بعد سے ان کا قد پارٹی میں کم ہوتا گیا ہے اور وزیر داخلہ امت شاہ کا قد پارٹی میں بڑھتا گیا ہے۔ ان کے اس بیان کی وجہ ان کی ناراضگی بھی ہو سکتی ہے۔ دہلی میں آٹھ فروری کو اسمبلی انتخابات ہونے ہیں جہاں تین پارٹیوں کے درمیان مقابلہ ہے جس میں بی جے پی، عام آدمی پارٹی اور کانگریس شامل ہیں۔