ڈیئر کوہلی، اپنی کرکٹ حب الوطنی اپنے پاس رکھئے، آئی جی کشمیر بسنت رتھ کا بیان

سرینگر: جموں وکشمیر کے انسپکٹر جنرل آف پولیس (آئی جی پی) ٹریفک بسنت کمار رتھ نے ہندوستانی کرکٹ ٹیم کے کپتان وراٹ کوہلی کے ایک ویڈیو جس میں انہوں نے غیر ملکی کھلاڑیوں کو پسند کرنے والے کرکٹ مداحوں کو ملک چھوڑنے کا مشور دیا تھا، پر اپنا ردعمل ظاہر کرتے ہوئے ہوئے کوہلی کو اپنی کرکٹ حب الوطنی اپنے پاس رکھنے کا مشورہ دیا ہے۔ بسنت رتھ کا کہنا ہے کہ وہ اب بھی جاوید میانداد کو ہی پسند کرتے ہیں۔

آئی پی ایس افسر بسنت رتھ نے ٹویٹ میں لکھا ’’ڈیئر وراٹ کوہلی، میں جاوید میانداد کو پسند کرتا ہوں۔ آپ براہ مہربانی اپنی کرکٹ حب الوطنی اپنے پاس رکھئے اور اسے اپنے اشتہاری معاہدوں تک ہی محدود رکھیں۔‘‘

بتادیں کہ ہندوستان کرکٹ ٹیم کے کپتان وراٹ کوہلی نے پانچ نومبر کو اپنی سالگرہ کے موقع پر اپنی ایپ لانچ کرکے اپنے مداحوں سے روابت کا ایک نیا سلسلہ قائم کیا۔ لیکن ایک مداح کے تبصرے پر ان کی اس ایپ پر جاری کردہ ایک ویڈیو انہیں بھاری پڑ رہا ہے۔ سوشل میڈیا پر انہیں سخت تنقید کا سامنا ہے۔ اس ویڈیو میں انہوں اس شخص کو ملک چھوڑنے کی صلاح دے ڈالی جس نے لکھا تھا کہ وہ کوہلی کی بلے بازی سے زیادہ برطانوی اور آسٹریلوی بلے بازوں کو پسند کرتے ہیں۔

کوہلی کے اس رد عمل پر سوشل میڈیا پر ان کا خوب مذاق اڑایا جا رہا ہے۔ لوگ کہہ رہے ہیں کہ اگر انہیں بیرونی چیزوں سے اتنی ہی دقت ہے تو پھر بیرونی چیزوں کا استعمال کیوں کرتے ہیں اور بیرونی سامانوں کا پرموشن کیوں نہیں بند کر دیتے۔