دہلی: قوت سماعت اور گویائی سے محروم لڑکی نے لگائی اکشر دھام میٹرو اسٹیشن سے چھلانگ، حالت نازک

نئی دہلی: دہلی کے اکشردھام میٹرو اسٹیشن کی چھت سے جمعرات کے روز ایک قوت گویائی اور سماعت سے محروم (گونگی اور بہری) لڑکی نے چھلانگ لگا کر خودکشی کرنے کی کوشش کی۔ لڑکی شدید زخمی ہے اور اس کا علاج چل رہا ہے۔ پولیس نے یہ اطلاع دی۔ لڑکی پلیٹ فارم نمبر 2 سے میٹرو اسٹیشن کی چھت پر چڑھ گئی۔ سیکورٹی عملہ اور پولیس نے اسے منانے کی بہت کوشش کی، لیکن اس نے ان لوگوں کی ایک نہ سنی۔

لڑکی کے اسٹیشن سے نیچے چھلانگ لگانے کی ویڈیو سوشل میڈیا پر وائرل ہو رہی ہے۔ ویڈیو میں سیکورٹی اہلکار اس کے نیچے کودنے سے پہلے اسے پرسکون کرنے کی کوشش کرتے بھی نظر آ رہے ہیں۔ لڑکی کو لال بہادر شاستری اسپتال لے جایا گیا ہے، جہاں اسے آئی سی یو وارڈ میں داخل کرایا گیا ہے۔

اس کا علاج کرنے والے ڈاکٹروں نے پولیس کو بتایا کہ وہ بیان دینے کی حالت میں نہیں ہے اور اس کی حالت تشویشناک ہے۔ ایک پولیس افسر نے کہا، ’’لڑکی گونگی اور بہری ہے۔ اس کے والدین بھی بہرے ہیں۔ انہیں اطلاع دے دی گئی ہے۔ اسے ایل بی ایس اسپتال میں داخل کرایا گیا ہے۔ اس کی ٹانگ اور ہاتھ میں فریکچر ہے اور اس کا علاج کیا جا رہا ہے۔‘‘

پولیس افسر نے کہا کہ یہ واقعہ صبح تقریباً 7.30 بجے پلیٹ فارم نمبر دو کی طرف پیش آیا۔ تاہم ابھی تک یہ معلوم نہیں ہو سکا کہ لڑکی نے یہ انتہائی قدم کیوں اٹھایا۔ اس معاملے میں مزید تفصیلات کا انتظار ہے۔