مہاجر مزدور کی لاش درخت سے لٹکی ہوئی ملی

اترپردیش کے ضلع بلرامپور کے پچپیڑوا علاقے میں پیر کو ایک مہاجر مزدور کی لاش مشتبہ حالت میں درخت سے لٹکی ہوئی ملی ہے۔

پولیس ذرائع نے بتایا کہ نارائن پور گاؤں کے باہر ایک شخص کی لاش آم کے درخت سے لٹکی ہوئی ملی ہے۔ متوفی کی شناخت شیوکمار(30)کے طور پر ہوئی۔ متوفی تقریبا 20دن پہلے ممبئی سے اپنے گھرآیا تھا۔ انہوں نے بتایا کہ متوفی گذشتہ شام گھر کے لئے ضروری سامان خریدنے گاؤں سے تھوڑی دور پرسیا چوراہا گیا تھا۔ آج اس کی لاش گاؤں کے باہر درخت سے لٹکی ہوئی ملی ہے۔ اطلاع ملنے پر موقع پر پہنچی پولیس نے لاش کو پوسٹ مارٹم کے لئے بھیج دیا ہے۔ پولیس معاملے کی جانچ کررہی ہے۔

دنیا بھر میں کورونا وائرس کے پھیلنے کے بعد سے کئی ممالک نے لاک ڈاؤن نافذ کر دیا جس کی وجہ سے معیشت پر بہت برا اثر پڑا ہے ۔ ہندوستان میں مارچ کے ماہ میں لاک ڈاؤن نافذ کیا گیا تھا جس کے بعد چھوٹی صنعتیں بند ہو گئی تھیں اور روز کا کام کر کے پیٹ پالنے والے مزدور پریشان ہو گئے تھے۔

پریشان حال مہاجر مزدوروں نے اپنے گھر جانے کے لئے ہر ممکن قدم اٹھائے اور بڑی تعداد میں یہ مہاجر مزدور پیدل ہی گھر کے لئے نکل گئے۔ پیدل واپس جانے والوں کو بڑی دقتوں کا سامنا کرنا پڑا اور کئی کی تو سڑک حادثوں میں موت بھی ہو گئی ۔ بہت سے مزدور اپنی تنگ دستی سے اتنے پریشان ہوئے کہ انہوں نے خود کشی کر لی۔