’داؤد ابراہیم ہماری سرزمین پر موجود نہیں‘ پاکستان کا تبدیل شدہ بیان

اسلام آباد: پاکستان نے انڈرورلڈ ڈان داؤد ابراہیم کے بارے میں بھارتی میڈیا میں کیے جانے والے دعوے کی تردید کرتے ہوئے داؤد کی موجودگی پر کئے گئے مبینہ اعتراف کو بے بنیاد قرار دیا ہے۔ پاکستانی وزارت خارجہ نے ایک بیان جاری کرتے ہوئے کہا ہے کہ ’بھارتی میڈیا میں یہ دعوی کیا جا رہا ہے کہ پاکستان نے اپنی سرزمین پر داؤد ابراہیم کی موجودگی کا اعتراف کر لیا ہے، یہ دعوی بے بنیاد اور گمراہ کن ہے۔‘ پاکستان نے اس بات کی بھی تردید کی ہے کہ بھی مسترد کر دیا کہ پاکستان 88 افراد پر نئی پابندیاں عائد کر رہا ہے۔

میڈیا رپورٹوں کے مطابق بین الحکومتی تنظیم ایف اے ٹی ایف (فنانشیل ایکشن ٹاسک فورس) کی نگرانی کی فہرست سے نکلنے کی کوششوں کے تحت پاکستان نے دہشت گردوں کی فہرست جاری کی تھی۔ اس فہرست میں داؤد ابراہیم کا نام بھی شامل تھا اور اس کا پتہ کراچی کے علاقے کلفٹن میں واقع وائٹ ہاؤس کے طور پر درج کیا گیا تھا۔

اب اپنے بیان کو تبدیل کرتے ہوئے پاکستان کی وزارت خارجہ نے کہا ’’18 اگست 2020 کو دو ایس آر او جاری کیے گئے تھے۔ اس فہرست میں اقوام متحدہ کی سلامتی کونسل کی قراردادوں کے مطابق نامزد افراد اور اداروں کے نام موجود ہیں۔ اس طرح کے ایس آر او وقتا فوقتا جاری کیے جاتے ہیں اور 2019 میں بھی اس طرح کے ایس آر اوز جاری کئے گئے تھے۔

واضح رہے کہ داؤد ابراہیم ممبئی میں 1993 میں ہونے والے سلسلہ وار بم دھماکوں کا کلیدی ملزم ہے۔ دھماکے انجام دینے کے بعد وہ اپنے کا کنبہ سمیت ممبئی سے فرار ہو گیا تھا۔ داؤد کا نام ہندوستان کی موسٹ وانٹڈ لسٹ میں شامل ہے۔ متعدد مواقع پر داؤد ابراہیم کی پاکستان میں موجودگی کے ثبوت دنیا کے سامنے ظاہر ہوتے رہے ہیں لیکن پاکستان ہر بار اس کی موجودگی کی تردید کرتا رہا۔