اروناچل پردیش اور سکم میں ووٹ شماری کی تاریخ تبدیل، اب 2 جون کو ہوگی گنتی

اروناچل پردیش اور سکم میں لوک سبھا انتخابات کے ساتھ اسمبلی انتخابات بھی ہوں گے لیکن ان دونوں ریاستوں میں اسمبلی انتخابات کے ووٹوں کی گنتی کی تاریخ میں تبدیلی کی گئی ہے، اب ووٹوں کی گنتی 2 جون کو ہوگی۔ جبکہ دونوں ریاستوں میں اسمبلی انتخابات کے لیے ووٹنگ 19 اپریل کو ہوگی۔ اروناچل پردیش اور سکم دونوں ریاستوں کی اسمبلیوں کی میعاد 2 جون 2024 کو ختم ہو رہی ہے۔

خیال رہے کہ الیکشن کمیشن نے ہفتہ کو اروناچل پردیش اسمبلی انتخابات کی تاریخوں کا اعلان کیا تھا۔ تمام 60 سیٹوں کے لیے ووٹنگ ایک ہی مرحلے میں 19 اپریل کو ہوگی۔ ووٹوں کی گنتی پہلے 4 جون کو ہونی تھی لیکن اب اس میں تبدیلی کر دی گئی ہے اور ووٹوں کی گنتی 2 جون کو کرائی جائے گی۔ تاہم آندھرا پردیش اور اوڈیشہ میں ووٹوں کی گنتی 4 جون کو ہی کرائی جائے گی۔

دراصل دونوں ریاستوں کی قانون ساز اسمبلی کی میعاد 2 جون کو ختم ہو رہی ہے۔ ایسے میں ووٹوں کی گنتی کسی بھی صورت میں 2 جون تک مکمل کر لی جائے۔ اس بات کو مدنظر رکھتے ہوئے الیکشن کمیشن نے ووٹوں کی گنتی کی تاریخ تبدیل کی ہے۔

اروناچل پردیش میں لوک سبھا اور اسمبلی انتخابات کے لیے ووٹنگ 19 اپریل کو ہوگی۔ کمیشن کے مطابق اسمبلی انتخابات کا نوٹیفکیشن 20 مارچ کو جاری کیا جائے گا جس کے بعد کاغذات نامزدگی کا عمل شروع ہوگا۔ کاغذات نامزدگی جمع کرانے کی آخری تاریخ 27 مارچ ہے جب کہ کاغذات نامزدگی کی جانچ پڑتال 28 مارچ کو ہوگی۔ کاغذات نامزدگی واپس لینے کی آخری تاریخ 30 مارچ ہے۔

اسی طرح سکم میں 19 اپریل کو لوک سبھا اور اسمبلی کے انتخابات ایک ساتھ ہوں گے۔ اس ہمالیائی ریاست میں صرف ایک لوک سبھا سیٹ اور 32 اسمبلی سیٹیں ہیں۔ الیکشن کمیشن کے مطابق انتخابی نوٹیفکیشن 20 مارچ کو جاری کیا جائے گا جس کے بعد کاغذات نامزدگی جمع کرانے کا عمل شروع ہوگا۔ کاغذات نامزدگی جمع کرانے کی آخری تاریخ 27 مارچ ہے جبکہ کاغذات نامزدگی کی جانچ پڑتال 28 مارچ کو ہوگی۔ کمیشن نے کہا کہ کاغذات نامزدگی واپس لینے کی آخری تاریخ 30 مارچ ہے۔ انتخابات میں حکمراں سکم کرانتی کاری مورچہ (ایس کے ایم) کا مقابلہ سکم ڈیموکریٹک فرنٹ (ایس ڈی ایف) سے ہوگا۔