یوکرین تنازعہ ختم کرنے کے لیے ہندستان روس سے بات چیت کرے: فریڈرکسن

ڈنمارک کی وزیر اعظم میٹے فریڈرکسن نے ہندوستان سے درخواست کی کہ وہ یوکرین تنازعہ ختم کرنے کے لیے روسی صدر ولادیمیر پوتن کے ساتھ بات چیت کرے۔

وزیر اعظم نریندر مودی سے بات چیت کے بعد صحافیوں کو دیے گئے ایک بیان میں انہوں نے امید ظاہر کی کہ ہندوستان یوکرین کے تنازعہ کو ختم کرنے کے لیے روس کے ساتھ بات چیت کرے گا۔ ڈنمارک کی وزیراعظم نے کہا کہ دونوں رہنماؤں نے یوکرین کے تنازعہ پر بات چیت کی۔

انہوں نے کہا کہ ہم بہت سی اقدار کا اشتراک کرتے ہیں، دونوں ممالک قوانین پر مبنی بین الاقوامی نظام پر یقین رکھتے ہیں اور قریبی شراکت داروں کے طور پر ہم نے یوکرین کے تنازعہ اور یوکرین میں سنگین انسانی بحران پر بھی بات چیت کی۔انہوں نے کہاکہ بوکا میں عام شہریوں کی ہلاکتوں کی رپورٹیں انتہائی افسوسناک ہیں۔ ہم نے ان ہلاکتوں کی مذمت کی ہے اور ہم نے آزادانہ تحقیقات کی ضرورت پر زور دیا ہے۔
انہوں نے کہا کہ ڈنمارک اور پوری یورپی یونین نے یوکرین پر روسی فوجی کارروائی کی شدید مذمت کی ہے۔

ڈنمارک کی وزیر اعظم نے کہاکہ میرا پیغام بہت واضح ہے، مسٹر پوٹن کو اس جنگ کو ختم کرنا ہے اور قتل کو روکنا ہے۔ مجھے امید ہے کہ ہندوستان اس بات چیت میں روس کو بھی متاثر کرے گا۔

وزیر اعظم نریندر مودی نے یوکرین پر اپنے تبصرے میں کہا کہ ہندوستان نے لڑائی کو فوری طور پر ختم کرنے کی اپیل کی ہے اور تنازع ختم کرنے کے لیے سفارت کاری اور بات چیت پر زور دیا ہے۔