گردابی طوفان ’سِترنگ‘ نے بنگلہ دیش میں لی 7 افراد کی جان، ملک کی کئی ریاستوں میں بھاری بارشوں کا الرٹ

نئی دہلی: شمالی خلیج بنگال سے اٹھنے والے طوفان 'سیترنگ' کے شمال مشرق کی طرف بڑھنے اور ساگر دیپ سے 260 کلومیٹر جنوب مغرب میں ٹکرانے کے بعد محکمہ موسمیات نے ساحلی بنگال میں موسلا دھار بارش کا انتباہ دیا ہے۔ محکمہ موسمیات کے مطابق طوفان کی وجہ سے مغربی بنگال کے شمالی 24 پرگنہ، جنوبی 24 پرگنہ اور نادیہ اضلاع میں بھی منگل کے روز بارش ہوگی۔

ہندوستان کے محکمہ موسمیات (آئی ایم ڈی) نے طوفان 'سترنگ' کے اثر سے آسام، میگھالیہ، میزورم اور تریپورہ میں بارش کا امکان ظاہر کیا ہے۔ 'سترنگ' سے متعلق حادثوں کے دوران بنگلہ دیش میں 7 افراد ہلاک ہو گئے ہیں۔ جبکہ حکام نے ہزاروں افراد کو محفوظ مقامات پر منتقل کر دیا ہے۔ بنگلہ دیش میں طوفان کے ملک کے جنوب مغربی ساحل کے قریب پہنچنے کے ساتھ ہی پیر کے روز 2.19 لاکھ سے زیادہ لوگوں کو محفوظ مقامات پر منتقل کیا گیا۔

آئی ایم ڈی کے مطابق یہ گردابی طوفان 24 اکتوبر کی رات 11.30 بجے ڈھاکہ سے 40 کلومیٹر مشرق میں ساحلی بنگلہ دیش پر مرکوز تھا۔ اگلے 6 گھنٹوں کے دوران اس کے شمال-شمال مشرق کی طرف بڑھنے اور کم دباؤ والے علاقے میں اور اگلے 6 گھنٹوں کے دوران کم دباؤ والے علاقے میں کمزور ہونے کا بہت امکان ہے۔ آسام، میگھالیہ، میزورم اور تریپورہ کے لیے بھاری سے بہت بھاری اور انتہائی بھاری بارش کا ریڈ الرٹ جاری کیا گیا ہے۔

آئی ایم ڈی کے مطابق پیر اور منگل کو تریپورہ کے کئی مقامات پر بونداباندی اور بھاری سے بہت بھاری اور شدید بھاری بارش کا امکان ہے۔ جب کہ آسام کے کئی اضلاع میں بھاری بارش کے لیے 'ریڈ' اور 'اورینج' الرٹ جاری کیا گیا ہے۔ آئی ایم ڈی نے ایک پریس ریلیز میں کہا کہ مغربی بنگال حکومت کو گردابی طوفان 'سترنگ' کے اثرات کے تحت ممکنہ تباہی سے نمٹنے کے لیے لوگوں کے انخلا اور امدادی سامان کی فراہمی سمیت تمام احتیاطی تدابیر اختیار کرتے ہوئے دیکھا گیا۔

محکمہ موسمیات نے گردابی طوفان کی وجہ سے پیر اور منگل کو مغربی بنگال میں دور دراز مقامات پر ہلکی سے درمیانی بارش اور بھاری سے بہت زیادہ بارش کی پیش گوئی کی ہے۔ ماہی گیروں کو اتوار سے اگلے نوٹس تک سمندر میں نہ جانے کا مشورہ دیا گیا ہے۔ وزیر اعلیٰ ممتا بنرجی نے تیاریوں کا جائزہ لینے کے لیے ریاستی سکریٹریٹ 'نابن' میں ایک ہنگامی اجلاس طلب کیا تھا۔ اس گردابی طوفان کا نام 'سیترنگ' تھائی لینڈ کی طرف سے دیا گیا ہے۔