بی آر ایس کے موجودہ رکن اسمبلی کانگریس میں شامل

حیدرآباد: بھارت راشٹر سمیتی (بی آر ایس) کے ایک موجودہ رکن اسمبلی وی ایم ابراہم جمعہ کو کانگریس میں شامل ہو گئے۔ پارٹی نے آخری وقت میں ان کی امیدواری منسوخ کر دی تھی۔ وی ایم ابراہم جوگولامبا-گڈوال ضلع کے عالم پور اسمبلی حلقہ سے رکن اسمبلی ہیں۔ ریاستی کانگریس کے سربراہ اے ریونت ریڈی نے پارٹی میں ان کا خیرمقدم کیا۔

رکن اسمبلی ابراہم اسمبلی نے انتخابات سے کچھ روز قبل کانگریس میں شمولیت اختیار کر لی۔ بی آر ایس نے اگست میں ابراہم کو اسی حلقہ انتخابت سے اپنا امیدوار بنایا تھا۔ انہوں نے انتخابی مہم بھی شروع کر دی تھی لیکن آخری وقت میں بی آر ایس نے امیدواری ان کی جگہ وجیوڈو کو سونپ دی۔

ایم ایل سی چلہ وینکٹرامی ریڈی کی قیادت میں پارٹی قائدین کے مطالبہ پر بی آر ایس نے اپنا امیدوار تبدیل کیا۔ ابراہم 2018 میں بی آر ایس کے ٹکٹ پر عالم پور سے منتخب ہوئے تھے، انہوں نے اپنے قریبی حریف کانگریس کے سمپت کمار کو 44000 سے زیادہ ووٹوں سے شکست دی تھی۔

ابراہم نے 2014 کے انتخابات میں تیلگو دیشم پارٹی (ٹی ڈی پی) کے ٹکٹ پر انتخاب لڑا لیکن سمپت کمار سے ہار گئے۔ ابراہم نے بعد میں ٹی آر ایس (اب بی آر ایس) میں شمولیت اختیار کر لی۔ تلنگانہ کی 119 رکنی اسمبلی کے لیے انتخابات 30 نومبر کو ہونے ہیں۔