سی آر پی ایف کے سب انسپکٹر نے انسپکٹر کو گولی مارنے کے بعد کی خودکشی

نئی دہلی: راجدھانی کے پاش لودھی اسٹیٹ علاقہ میں ایک سنسنی خیز واقعہ میں سینٹرل ریزرو پولیس فورس (سی آر پی ایف) کے ایک سب انسپکٹر نے پہلے اپنے سینئر ساتھی انسپکٹر کو گولی مار کر ہلاک کر دیا اور بعد میں خود کو گولی مار کر خودکشی کر لی۔ یہ معاملہ جمعہ کی رات کا ہے۔

سی آر پی ایف نے اپنے بیان میں دہلی پولیس کے حوالہ سے بتایا کہ سی آر پی ایف کی 122ویں بٹالین کے سب انسپکٹر کرنیل سنگھ نے پہلے انسپکٹر دشرتھ سنگھ کو گولی مار دی اور پھر خود کو بھی گولی مار لی۔ دونوں موقع پر ہی دم توڑ گئے۔ فی الحال اس واقعہ کی کوئی وجہ سامنے نہیں آئی ہے۔ اس سے پہلے دونوں کے مابین کچھ تنازعہ ضرور ہوا تھا۔ سب انسپکٹر کرنیل جموں و کشمیر کے ادھم پور کا رہنے والا تھا جبکہ انسپکتر دشرتھ سنگھ ہریانہ کے روہتک کا رہائشی تھا۔

پولیس کے مطابق جمعہ کی رات تقریباً 10.30 بجے تغلق روڈ تھانہ کو اطلاع موصول ہوئی۔ پولیس ٹیم جب موقع پر پہنچی تو انسپکٹر اور سب انسپکٹر زمین پر پڑے ہوئے اور ان کو گولی لگی تھی۔ دونوں کی موت واقع ہو چکی تھی۔ پولیس اس معاملہ کی تفتیش کر رہی ہے کہ سب انسپکٹر نے یہ بہیمانہ قدم کیوں اٹھایا۔ واقعہ 61 لودھی اسٹیٹ کا ہے۔ سینئر افسران موقع پر پہنچ گئے ہیں اور معاملہ کی تحقیقات کی جا رہی ہے۔