صدیق کپن سے پوچھ گچھ کے لیے ایس ٹی ایف کی اپیل خارج

اترپردیش میں متھرا ڈسٹرکٹ ایڈیشنل سیشن جج آئی انل کمار پانڈے نے ایس ٹی ایف کی اس دلیل کو مسترد کر دیا ہے کہ چارج شیٹ دائر ہونے کے بعد اس نے عدالت سے ملزم صدیق کپن سے دوبارہ پوچھ گچھ کی اجازت ایک درخواست کے ذریعے مانگی تھی۔

استغاثہ کی جانب سے (ایس ٹی ایف کی طرف سے) ایک درخواست عدالت میں پیش کی گئی کہ 11 نومبر 2020 کو دہلی میں ملزم صدیق کپن کی رہائش گاہ پر چھاپہ مارا گیا اور تلاشی کے دوران برآمد ہونے والے کتابچے میں کالعدم تنظیم سمی کا لٹریچر برآمد ہوا تھا۔ برآمد لٹریچر میں ہاتھ سے لکھی تحریر ملان کے لئے 8 مارچ کو ، ملزم کپن کی دستاویز اور نمونہ آرٹیکل فرنسک سائنس لیبارٹری ، آگرہ کو بھیجا گیا تھا ، جس کی رپورٹ 2 جون کو موصول ہوئی ہے۔

رپورٹ میں تحریر کا ملان نہیں ہوا ہے۔ چونکہ کپن کے کمرے سے لٹریچر برآمد ہوا ہے ، اس لیے کالعدم تنظیم سمی کی دستاویزات کے حوالے سے ملزم صدیق کپن سے پوچھ گچھ ضروری ہے۔ کپن سے پوچھ گچھ کے لیے جج سے اجازت مانگی گئی تھی لیکن ملزم کی جانب سےتحریری طور پر اس کی مخالفت کی۔

دفاعی وکیل مدھوبن دت چترویدی نے بتایا کہ عدالت میں چارج شیٹ داخل کی گئی ہے اور ایس ٹی ایف کی درخواست پہلے کی عدالتی کارروائی کا ایک حصہ ہے۔ یہ مزید کسی انکوائری سے متعلق نہیں ہے ، اس لیے ایس ٹی ایف کی درخواست کو خارج کرنے کے قابل ہے ۔

ایڈیشنل سیشن جج اول نے اپنے حکم میں لکھا ہے کہ ملزم کے خلاف چارج شیٹ عدالت کو بھیج دی گئی ہے۔ اس لیے استغاثہ کی درخواست اس مرحلے پر قابل قبول نہیں ہے ، اس لیے استغاثہ کی جانب سے پیش کی گئی درخواست خارج کی جاتی ہے۔