ملک منموہن سنگھ جیسے وزیرِ اعظم کی کمی محسوس کر رہا ہے: راہل گاندھی

کانگریس کے سابق صدر راہل گاندھی نے ہندوستان میں معاشی اصلاحات کے معمار سابق وزیر اعظم منموہن سنگھ کی سالگرہ پر مبارکباد دی ہے۔ راہل گاندھی نے منموہن سنگھ کو یاد کرتے ہوئے کہا کہ ملک ان جیسے وزیر اعظم کی کمی شدت سے محسوس کر رہا ہے۔

راہل گاندھی نے ٹویٹ کیا، ’’ہندوستان آج منموہن سنگھ جیسی سمجھ والے وزیر اعظم کی کمی شدت سے محسوس کر رہا ہے۔ ان کی دیانت داری، شائستگی اور لگن ہم سب کے لئے الہام ہے۔ یوم پیدائش کی مبارک باد میں خواہش کرتا ہوں کہ ان کا آگے کا سال خوبصورت ہو۔‘‘

خیال رہے کہ 26 ستمبر 1932 کو پیدا ہونے والے ڈاکٹر منموہن سنگھ 2004 سے 2014 تک ہندوستان کے وزیر اعظم رہے ہیں۔ منموہن سنگھ اپنی سادگی کی وجہ سے ملک کے دوسرے وزرائے اعظم سے مختلف ہیں۔ آپ کو ایک ماہر معاشیات کے طور پر جانا جاتا ہے، جنہوں نے لبرلائزیشن کی پالیسیوں کے ذریعے 1990 کے عشرے میں ہندوستانی معیشت کو بحران سے نجات دلائی تھی۔

اکسفورڈ یونیورسٹی سے پی ایچ ڈی کرنے والے ڈاکٹر منموہن سنگھ پی وی نرسمہا راؤ حکومت میں وزیر خزانہ تھے۔ انہوں نے اس عرصے میں مالی بجٹ پیش کیا اور 1991-1995 کے دوران ملکی معیشت بحران سے باہر آ گئی۔ ڈاکٹر منموہن سنگھ ریزرو بینک کے گورنر بھی رہے ہیں اور انہوں نے اس عہدے پر رہتے ہوئے بھی معاشی اصلاحات کی سمت کئی اقدامات اٹھائے تھے۔