اندور میں کورونا ہوا بے قابو، ناکام شیوراج نے مرکزی ٹیم کا کیا استقبال

مدھیہ پردیش کا اندور اس وقت کورونا وائرس انفیکشن معاملہ میں ہندوستان کا سب سے بڑا ہاٹ اسپاٹ تصور کیا جا رہا ہے۔ وزیر اعلیٰ شیوراج سنگھ چوہان کی ناکامی کہیں یا پھر ان کی غلط پالیسی، کہ حالات بہتر ہونے کی جگہ بدتر ہی ہوتے چلے جا رہے ہیں۔ لگاتار بڑھتے معاملوں اور ہلاکتوں کی وجہ سے مرکزی حکومت نے اپنی ایک ٹیم اندور بھیجی ہے جس کا وزیر اعلیٰ شیوراج چوہان نے یہ کہتے ہوئے استقبال کیا ہے کہ ان کی مدد سے اندور میں کورونا پر قابو پانے میں مدد ملے گی۔

وزیر اعلی کا کہنا ہے کہ کورونا کے انفیکشن سے نمٹنے کے لئے مرکز کی جانب سے بھیجی گئی ٹیم کے تعاون اور تجویز سے ہمیں اندور میں کورونا وائرس انفیکشن مزید پھیلنے سے روکنے میں جلد ہی کامیابی ملے گی۔ انھوں نے اپنے اس بیان کے ساتھ غالباً اپنی شکست تسلیم بھی کر لی ہے کیونکہ گزشتہ کئی دنوں سے حالات پر قابو پانے کے لیے شیوراج سنگھ کوششیں کرتے رہے، لیکن انھیں کامیابی نہیں ملی۔

پیر کے روز شیوراج چوہان نے ٹوئٹ کے ذریعہ مرکزی ٹیم کے اندور پہنچنے کی خبر دی۔ انھوں نے اپنے ٹوئٹ میں کہا کہ ’’اندور میں ہمارے ساتھ کوووڈ-19 کی لڑائی میں ساتھ دینے کے لئے مرکز کی طرف سے ایک خصوصی ٹیم بھیجی گئی ہے۔ ہم اس ٹیم کا خیرمقدم کرتے ہیں اور ان کی تجاویز سے ہمیں اندور میں کورونا وائرس کے انفیکشن کی روک تھام میں جلد از جلد کامیابی ملے گی۔"

وزیر اعلیٰ نے اپنے ایک دیگر ٹوئٹ میں یہ بھی لکھا کہ "میں وزیر اعظم نریندر مودی کا شکر گزار ہوں جو ہماری رہنمائی کر رہے ہیں اور ہمیشہ ریاست کے ساتھ کھڑے ہیں۔ میں ملک کے وزیر داخلہ امت شاہ اور وزیر صحت ڈاکٹر ہرش وردھن کا بھی شکر گزار ہوں ، جو ہمارے ساتھ کندھے سے کندھا ملا کر لڑ رہے ہیں۔ ‘‘

اسی تعلق سے کیے گئے اپنے تیسرے ٹوئٹ میں شیوراج چوہان لکھتے ہیں کہ "ہمارے وزیر اعظم مودی کی قیادت میں ، پورا ملک کورونا کے ساتھ جنگ لڑ رہا ہے اور مدھیہ پردیش کو ان کا پورا پورا ساتھ مل رہا ہے۔ میں ان کے تعاون کے لئے دل سے مبارکباد پیش کرتا ہوں۔ ہمیں وزیر داخلہ امت شاہ کی جانب سے بھی مستقل رہنمائی مل رہی ہے۔ میں ان کا بھی شکریہ ادا کرتا ہوں۔‘‘

واضح رہے کہ سرکاری اطلاعات کے مطابق گزشتہ رات اندور میں آئی جانچ رپورٹ میں سات نئے پازیٹو معاملات کے سامنے آنے کے بعد وہاں متاثرہ افراد کی تعداد 890 سے بڑھ کر 897 ہوگئی ۔ قابل ذکر یہ بھی ہے کہ 52 افراد کی اب تک اس انفیکشن کی وجہ سے موت ہوچکی ہے۔ اندور کے یہ اعداد و شمار خوفناک ہیں اور غالباً اسی کو دیکھتے ہوئے مرکزی ٹیم اندور پہنچی ہے تاکہ حالات کو قابو میں کیا جا سکے۔

(یو این آئی ان پٹ کے ساتھ)