یوگی حکومت پر کورونا کا حملہ جاری، ایک اور وزیر متاثر

لکھنؤ: یوگی حکومت کے تمام دعووں کے باوجود کورونا وائرس کا اثر بڑھتا جا رہا ہے اور حالات یہ ہیں کہ خود وزرا تک اس سے متاثر ہو رہے ہیں۔ اتر پردیش میں کابینہ وزیر ستیش مہانا ہفتہ کے روز کورونا متاثر پائے ہیں۔ وزیر نے خود ٹوئٹ کر کے اس کی اطلاع دی۔

صنعتی ترقی کے وزیر ستیش مہانا نے ٹوئٹر پر لکھا ’’کووڈ کی ابتدائی علامات نظر آنے پر کل میں نے ٹیسٹ کرایا جس کی رپورٹ پازیٹو آئی ہے۔‘‘ انہوں نے کہا، ’’ڈاکٹروں کی صلاح پر میں خانہ قرنطینہ میں چلا گیا ہوں۔ میری درخواست ہے کہ آپ میں جو بھی لوگ گزشتہ دنوں میرے رابطہ میں آئے ہیں برائے کرم وہ اپنی جانچ کرا لیں۔

خیال رہے کہ یوگی حکومت کے کئی وزیر کورونا کا شکار ہو چکے ہیں جبکہ اس کے انفیکشن سے دو کابینہ کے وزیر کمل رانی ورون اور چیتن چوہان کا انتقال ہو چکا ہے۔ پارلیمانی امور اور وزیر صحت سریش کھنا نے جمعرات کے روز ہی کہا تھا کہ ریاست بھر میں لاک ڈاؤن کو سختی سے نافذ کرانے کا ہی یہ نتیجہ ہے کہ حکومت کورونا وائرس کے اثر کو بہت حد تک روکنے میں کامیاب رہی ہے!

الہ آباد میں سواروپ نہرو اسپتال میں کورونا کے مریضوں کے لئے طبی سہولیات کا جائزہ لینے کے لئے پہنچے وزیر نے کہا، ’’اتر پردیش کے مقابلہ چھوٹے چھوٹے کئی صوبوں میں کورونا کے مریضوں کی تعداد کہیں زیادہ ہے اور شفایابی کی شرح (ریکوری ریٹ) بھی اتر پردیش سے کم ہے۔ آج ہمارا ریکوری ریٹ 64 فیصد ہے اور محض 6400 کرونا سے متاثر مریض ہیں۔ تاحال صرف 600 لوگوں کی ہی موت ہوئی ہے۔‘‘