ملک میں کورونا نے پھر دی دستک، وزارت صحت کے مطابق 24 گھنٹوں میں 148 افراد متاثر

نئی دہلی: دنیا بھر میں لاکھوں افراد کی جان لینے والی کورونا وبا اب بھی تشویش کا باعث بنی ہوئی ہے۔ سردیوں کے آغاز کے ساتھ ہی ہندوستان میں کورونا وائرس کے انفیکشن کے نئے کیسز سامنے آئے ہیں۔ اس کے بعد ایک بار پھر انفیکشن میں اضافے کو لے کر تشویش نظر آنے لگی ہے۔

خبر رساں ایجنسی پی ٹی آئی کی رپورٹ کے مطابق ہندوستان میں ایک دن میں کورونا وائرس کے انفیکشن کے 148 نئے کیسز سامنے آئے ہیں۔ یہ معلومات ہفتہ (9 دسمبر) کو مرکزی وزارت صحت کے تازہ ترین اعداد و شمار میں دی گئی ہے۔ صبح 8 بجے اپ ڈیٹ کیے گئے اعداد و شمار کے مطابق مریضوں کی تعداد میں اضافے کے بعد اسپتال میں زیر علاج مریضوں کی تعداد 808 ہو گئی ہے، جو تشویشناک ہے۔

محکمہ صحت کے اعداد و شمار کے مطابق اب تک کورونا وائرس انفیکشن کے کل کیسز کی تعداد 4 کروڑ 50 لاکھ 2 ہزار 889 ہے۔ جبکہ مرنے والوں کی تعداد 5 لاکھ 33 ہزار 306 ہے۔

وہیں، کردہ ہیلتھ بلیٹن میں کہا گیا ہے کہ 4 کروڑ 44 لاکھ 68 ہزار 775 لوگ انفیکشن سے صحت یاب ہو کر گھروں کو لوٹ چکے ہیں جو کہ راحت کی بات ہے۔ ملک میں انفیکشن سے صحت یاب ہونے کی شرح 98.81 فیصد ہے جبکہ اموات کی شرح صرف 1.19 فیصد ہے۔ وزارت صحت کی ویب سائٹ کے مطابق، اب تک ملک بھر میں کووڈ ویکسین کی 220.67 کروڑ خوراکیں دی جا چکی ہیں۔

واضح رہے کہ کورونا کے بعد چین میں نمونیا کا پراسرار انفیکشن پھیل گیا ہے اور ملک میں کچھ کیسز بھی سامنے آئے ہیں، جس کے حوالے سے مرکز نے پہلے ہی الرٹ جاری کر دیا ہے۔ اس دوران ملک میں کورونا کے نئے کیسز میں اضافے سے تشویش ایک بار پھر بڑھنے لگی ہے۔