اسکول کھلتے ہی کورونا کا پھیلاؤ، ممبئی کے ایک اسکول کے 16 طلبا متاثر

ممبئی: جہاں انتظامیہ اسکولوں کو دوبارہ شروع کرنے کی کوشش کر رہی ہے، وہیں بچوں تک پہنچنے والے انفیکشن نے تشویش میں اضافہ کر دیا ہے۔ نوی ممبئی کے ایک اسکول میں بڑے پیمانے پر جانچ کے دوران 16 طلباء کورونا سے متاثر پائے گئے ہیں۔ یہ تمام طلباء آٹھویں سے گیارہویں جماعت میں پڑھتے ہیں۔ 18 دسمبر کو اسکولوں میں بڑے پیمانے پر ٹیسٹنگ کے دوران 600 طلباء کا ٹیسٹ کیا گیا تھا۔

اتنی بڑی تعداد میں طلباء کے متاثر ہونے کے بعد انتظامیہ میں ہلچل مچ گئی ہے۔ نوی ممبئی میونسپل کارپوریشن کے محکمہ صحت کے مطابق اس اسکول میں زیر تعلیم ایک طالبہ کے والد چند روز قبل قطر سے ہندوستان واپس آئے تھے۔ احتیاط کے طور پر بیرون ملک سے واپس آنے والے اس شخص سمیت اس کے پورے خاندان کا کووڈ ٹیسٹ کیا گیا۔ اس ٹیسٹ میں اس شخص کی کووڈ رپورٹ منفی آئی، لیکن بیٹی کی رپورٹ پازیٹو آئی۔ اس کے بعد مثبت طالب علم کے رابطے میں آنے والے طلبہ کا کووڈ ٹیسٹ کیا گیا جس میں 16 طلبہ متاثر پائے گئے۔

خیال رہے کہ مہاراشٹر کے تھانے اور نوی ممبئی میں اسکول 15 دسمبر سے دوبارہ کھولے گئے تھے۔ اسکول کھلتے ہی بچے انفیکشن کی لپیٹ میں آ گئے، جس سے انتظامیہ پریشان ہے۔ اسکول کھلنے سے پہلے کمروں کی صفائی سمیت تمام رسمی کارروائیاں مکمل کر لی گئی تھیں۔ انتظامیہ نے اب اسکول میں بڑے پیمانے پر کورونا ٹیسٹنگ کیمپ کا انعقاد کیا ہے۔