لاک ڈاؤن میں شادی کرنے کا بھگتنا پڑا خمیازہ، دولہا-دلہن سمیت درجنوں مہمان گرفتار

ہندوستان میں لاک ڈاؤن کی خلاف ورزی کا معاملہ کئی مقامات پر سامنے آ چکا ہے اور کئی شہروں میں تو شادی بیاہ کا عمل بھی دیکھنے کو ملا جس کے خلاف پولس نے کارروائی کی ہے۔ لیکن صرف ہندوستان میں ہی ایسا نہیں ہو رہا ہے بلکہ کئی ممالک ایسے ہیں جہاں کورونا وائرس انفیکشن کی وبا کے درمیان لاک ڈاؤن ہے اور کچھ لوگ اس کی خلاف ورزی کرنے سے پیچھے نہیں ہٹ رہے ہیں۔ ایسا ہی ایک معاملہ جنوبی افریقہ میں پیش آیا ہے جہاں لاک ڈاؤن کی خلاف ورزی کرتے ہوئے شادی کی تقریب کا انعقاد ہوا۔

کچھ ہندی نیوز پورٹل پر شائع خبروں کے مطابق جنوبی افریقہ میں لاک ڈاؤن کے درمیان 48 سالہ جبولانی جولو اور 39 سالہ نومتھانڈجو کی شادی ہو رہی تھی تبھی پولس آ گئی اور دولہا-دلہن سمیت وہاں موجود تقریباً 50 مہمانوں کو گرفتار کر لیا۔ پولس نے اس شادی کو رکوانے کے لیے ہوائی فائرنگ کا استعمال کیا جس کا ویڈیو بھی سوشل میڈیا پر وائرل ہو رہا ہے۔

اس شادی تقریب کو رکوانے کے لیے پولس کے ذریعہ کی گئی کارروائی کی ویڈیو کے ساتھ ساتھ کچھ تصویریں بھی سامنے آئی ہیں جس کو دیکھنے پر پتہ چلتا ہے کہ دولہا-دلہن کو پولس نے گرفتار کر کے پولس وین میں بٹھایا اور تھانہ لے گئی۔ ذرائع کے مطابق بعد میں دولہا-دلہن اور 50 دیگر گرفتار مہمانوں کو ضمانت پر چھوڑ دیا گیا، لیکن ساتھ ہی انھیں تنبیہ بھی کی گئی کہ وہ لاک ڈاؤن کی خلاف ورزی کسی بھی حال میں نہ کریں۔

اس پورے واقعہ کے تعلق سے بتایا جاتا ہے کہ پولس کو کسی نے خبر دی کہ کوازُل-نتال میں عوامی تقریبات پر پابندی کے باوجود شادی ہو رہی ہے۔ یہ خبر ملتے ہی پولس فوراً وہاں پر پہنچی۔ اس کے بعد دولہا، دلہن، پادری اور شادی میں شامل ہونے آئے سبھی مہمانوں کو گرفتار کر لیا گیا۔ قابل ذکر ہے کہ کورونا وائرس وبا کو دیکھتے ہوئے جنوبی افریقہ میں لاک ڈاؤن جاری ہے۔ اب تک اس ملک میں کورونا انفیکشن کے تقریباً 2 ہزار معاملے سامنے آ چکے ہیں اور تقریباً ڈیڑھ درجن افراد کی موت بھی ہو چکی ہے۔