دہلی میں پھر کورونا وائرس کے مریضوں کی تعداد چار ہزار کے پار

قومی دارالحکومت دہلی میں ہفتہ کے روز کورونا وائرس کے 4116 نئے متاثرین کی رپورٹ آنے سے متاثرہ افراد کی تعداد 3.52 لاکھ کے پار ہوگئ ہے۔ سب سے بڑی تشویش کی بات یہ ہے کہ اس عرصے کے دوران مریضوں کی شفایابی کی شرح میں کمی ہونے سے زیر علاج مریضوں کی تعداد میں اضافہ ہوا ہے۔

دہلی میں بڑھتی آلودگی کی وجہ سے بھی کورونا کے مریضوں کی تعداد میں اضافہ ہو رہاہے۔دوسری جانب تہواروں کی وجہ سے بازاروں میں بھیڑ نظر آ رہی ہےجوخود اپنےآپ میں تشویش کا پہلوہے۔ دہلی کےعوام نے اگر اس تعلق سےاحتیاط نہیں برتی تو کورونا وائرس کےپھیلنے میں مزید تیزی آ سکتی ہے۔

دہلی کی وزارت صحت کی طرف سے جاری ہونے والے اعداد و شمار کے مطابق دارالحکومت دہلی میں متاثرہ افراد کی تعداد بڑھ کر 352520 ہوگئی۔ مزید 3614 مریضوں کی شفایابی کی وجہ سے اب تک مجموعی طور پر 319828 افراد کورونا وائرس سے نجات پاچکے ہیں۔ اس کے ساتھ کورونا مریضوں کی شفایابی کی شرح جزوی طور پر کم ہوکر 90.72 فیصد ہو گئی جبکہ جمعہ کے روز یہ شرح 90.76 فیصد تھی۔