ہندوستان میں کورونا کے معاملوں میں اضافہ جاری، 2.71 لاکھ نئے کیسز

نئی دہلی: ہندوستان میں کورونا وائرس کے معاملوں میں اضافہ کا سلسلہ لگاتار جاری ہے۔ گزشتہ 24 گھنٹوں میں ملک میں کورونا کے 271202 نئے کیسز کی تصدیق کی گئی، یہ تعداد گزشتہ روز کے مقابلے 2369 زیادہ ہیں۔ نئے مریضوں کی تصدیق کے بعد ملک میں فعال کورونا مریضوں کی تعداد 15 لاکھ 50 ہزار 377 ہو گئی ہے، جبکہ پازیٹیوٹی کی شرح 16.28 فیصد تک پہنچ گئی ہے۔

ملک میں گزشتہ 24 گھنٹوں کے دوران 314 افراد کی موت ہوئی ہے، جب کہ 138331 مریض شفایاب یاب ہو کر گھروں کو لوٹ چکے ہیں۔ ساتھ ہی، کورونا کے نئے ویرینٹ اومیکرون کے کیسز بھی مسلسل بڑھ رہے ہیں۔ ملک میں اب تک اومیکرون کے 7743 کیسز رپورٹ ہوئے ہیں۔ گزشتہ 24 گھنٹوں میں اومیکرون کے کیسز میں 28.17 فیصد کا اضافہ ہوا ہے۔

محکمہ صحت کے مطابق ملک میں گزشتہ 24 گھنٹوں کے دوران 16 لاکھ سے زائد کورونا ٹیسٹ کیے گئے۔ دوسری جانب ملک میں کورونا ٹیکہ کاری مہم کا اتوار کو ایک سال مکمل ہو گیا۔ اب تک ملک میں 156.76 کروڑ ٹیکوں کی خوراکیں لگائی جا چکی ہیں۔ ملک میں کورونا سے شفا یاب ہونے کی شرح 94.51 فیصد ہے اور اب تک مجموعی طور پر 3 کروڑ 50 لاکھ 85 ہزار 721 کورونا مریض صحت یاب ہو کر گھروں کو لوٹ گئے ہیں۔

مہاراشٹر سب سے متاثرہ ریاست

مہاراشٹر ملک میں سب سے زیادہ متاثرہ ریاست ہے۔ گزشتہ 24 گھنٹوں میں یہاں کورونا کے 42462 نئے کیسز رپورٹ ہوئے ہیں، اس دوران 23 لوگوں کی موت واقع ہوئی۔ ریاست میں ایکٹیو کیسز بڑھ کر 2.6 لاکھ ہو گئے ہیں۔ ممبئی میں گزشتہ 24 گھنٹوں کے دوران 81 پولیس اہلکار متاثر پائے گئے۔ اب تک یہاں 1312 پولیس اہلکار کورونا کا شکار ہو چکے ہیں اور 126 کی موت ہو چکی ہے۔ ریاست میں گزشتہ 24 گھنٹوں میں اومیکرون کے 125 کیسز پائے گئے۔ اب تک یہاں امیکرون کے 1730 کیسز پائے گئے ہیں۔

دہلی میں نئے کیسز میں کمی مگر انفیکشن کی شرح 30 فیصد سے زیادہ

راجدھانی دہلی میں گزشتہ 24 گھنٹوں کے دوران 20718 نئے معاملے درج کئے گئے۔ یہ تعداد گزشتہ روز کے مقابلہ کم ضرورر ہے، تاہم یہاں لگاتار دوسرے دن کورونا کے انفیکشن کی شرح یعنی پازیٹوٹی ریٹ 30 فیصد سے زیادہ بنی ہوئی ہے۔ فی الحال دہلی میں انفیکشن کی شرح 30.64 فیصد ہے۔ گزشتہ 24 گھنٹوں کے دوران دہلی میں کورونا کے 30 مریضوں کی موت واقع ہوئی اور فعال معاملوں کی تعداد بڑھ کر 93407 ہو گئی۔ گزشتہ 15 دنوں میں دہلی میں 228 لوگوں کی کورونا سے موت ہو چکی ہے۔