کارپوریشن میں حکومت بننے پر کنٹریکٹ ملازمین کو مستقل کیا جائے گا: سسودیا

نئی دہلی: عام آدمی پارٹی کے سینئر لیڈر اور دہلی کے نائب وزیر اعلیٰ منیش سسودیا نے کہا کہ دہلی میونسپل کارپوریشن میں ان کی حکومت میں صفائی ملازمین کو ہر ماہ وقت پر تنخواہ دی جائے گی اور تمام کنٹریکٹ ملازموں کو مستقل کیا جائے گا۔

پیر کو سسودیا نے گوکل پور، روہتاس نگر اور شاہدرہ اسمبلی کے کائی وارڈوں میں منعقد کی گئی نکڑ سبھا میں لوگوں سے بات چیت کی اور لوگوں کے مسائل جانے۔ اس دوران عوام سے اپیل کرتے ہوئے انہوں نے کہا کہ اس بار ان کے وارڈ میں کیجریوال کا کونسلر منتخب کریں۔

انہوں نے کہا کہ ایم سی ڈی انتخابات میں صرف چھ دن باقی ہیں۔ اس لیے اب لوگوں کو چاہیے کہ وہ اگلے چھ دنوں تک اپنے وارڈ کے ہر گھر میں جائیں اور لوگوں کو یہ بتائیں کہ اگر کوئی بی جے پی یا کانگریس کا کونسلر آیا تو اگلے پانچ سال وہ صرف لڑے گا اور عوام کے کام کو روکے گا۔ دہلی کی بہتری اور ایم سی ڈی میں اپنے تمام کام کروانے کے لیے صرف اروند کیجریوال کے کونسلر کا انتخاب کریں۔

سسودیا نے کہا کہ بی جے پی نے دہلی کا کچرا صاف نہیں کیا اور انہوں نے پوری دہلی کو کچرا گھر بنا دیا ہے۔ یہی نہیں، بی جے پی صفائی ملازمین کی مہینوں تنخواہیں ادا نہیں کرتی ہے۔ ریٹائر ہونے والے صفائی ملازمین کو ان کی آخری رقم بھی نہیں ملی۔ انہوں نے کہا کہ ایم سی ڈی میں کیجریوال کی حکومت آتے ہی صفائی ملازمین کو ان تمام مسائل سے نجات مل جائے گی۔ صفائی ملازمین کو ہر ماہ وقت پر ادائیگی کی جائے گی اور تمام عارضی ملازمین کو مستقل کیا جائے گا۔

سسودیا نے کہا کہ بی جے پی بچوں کو ناخواندہ رکھنا چاہتی ہے۔ انہیں غریب بچوں کی تعلیم سے مسئلہ ہے، یہی وجہ ہے کہ انہوں نے دہلی میونسپل کارپوریشن کے اسکولوں کی مرمت نہیں کروائی اور آج ایم سی ڈی اسکولوں کی حالت خراب ہوگئی ہے۔ انہوں نے کہا کہ بی جے پی کی جانب سے اسکولوں کی مرمت نہیں کی گئی، اس کے برعکس گوکل پوری وارڈ میں اسکول کی دیوار کے باہر ڈمپنگ یارڈ بنا کر بچوں اور وہاں سے گزرنے والے ہر شہری کی زندگی کو جہنم بنا دیا ہے۔

انہوں نے کہا کہ عام آدمی پارٹی کے لیے لوگوں کی محبت اور بی جے پی کی غلط حکمرانی کے خلاف ابلتا ہوا غصہ دیکھ کر مجھے یقین ہے کہ اس بار ایم سی ڈی میں بھی کیجریوال جی کی حکومت آنے والی ہے اور بی جے پی کا کلین سویپ ہونے والا ہے۔