کیا ٹرین پلٹنے کی ہو رہی سازش! اب رائے بریلی میں پٹری پر موجود سیمنٹ کے سلیپر سے مال گاڑی کی ٹکر

دو دن پہلے کی ہی بات ہے جب اتر پردیش کے رائے بریلی میں ریل کی پٹریوں پر مٹی کا ڈھیر رکھا ہوا ملا تھا۔ اب کچھ ایسا ہی معاملہ ایک بار پھر دیکھنے کو ملا ہے جب مال گاڑی کے راستے میں پٹری پر سیمنٹ سے بنا سلیپر پایا گیا ہے۔ لگاتار اس طرح کا معاملہ سامنے آنے کے بعد سوال اٹھنے لگا ہے کہ کیا ٹرین کو پلٹنے کی سازش ہو رہی ہے!

ریلوے ذرائع نے بدھ کے روز اس معاملہ کے بارے میں جانکاری دیتے ہوئے بتایا کہ منگل کی شب تقریباً 11 بجے رائے بریلی-پریاگ راج ریل ڈویژن پر لکشمن پور ریلوے اسٹیشن کے قریب ایک بڑا حادثہ ہوتے ہوتے بچا۔ ستنا (مدھیہ پردیش) سے کندن گنج (رائے بریلی) آ رہی ایک مال گاڑی بینی کاما کے پاس لکشمن پور اور دریاپور استیشنوں کے درمیان پٹری پر رکھے سیمنٹ سے تیار سلیپر سے ٹکرا گئی۔ بتایا جا رہا ہے کہ مال گاڑی کے لوکو پائلٹ نے ایمرجنسی بریک لگا کر ٹرین کو روکنے کی کوشش کی، لیکن اس کے باوجود انجن کا کیٹل گارڈ پٹری پر رکھے سلیپر سے ٹکرا گیا۔ ڈرائیور کی سمجھداری ہی تھی کہ اس طرح بڑا حادثہ ٹل گیا۔ بعد ازاں لوکو پائلٹ نے اس کی اطلاع کنٹرول روم کو دی۔

ذرائع کا کہنا ہے کہ خبر ملتے ہی ریل اہلکار جائے وقوع پر پہنچ گئے اور پٹری پر موجود سلیپر کو ہٹایا۔ اس کے بعد مال گاڑی کو آگے کے لیے روانہ کر دیا گیا۔ ریلوے سیکورٹی فورس (آر پی ایف) کے افسران کا کہنا ہے کہ اس معاملے میں نامعلوم لوگوں کے خلاف ایف آئی آر درج کی جائے گی، اور پھر معاملے کی تحقیقات کو آگے بڑھایا جائے گا۔