کانگریس کی شیلا دکشت حکومت نے راجدھانی کو بہترین نظام دیا، جسے کیجریوال حکومت نے تباہ کر دیا: دیویندر یادو

نئی دہلی: دہلی پردیش کانگریس کمیٹی کے صدر دیویندر یادو نے بارشوں کے درمیان دہلی میں پیش آ رہے حادثوں پر کیجریوال حکومت کو ہدف تنقید بنایا۔ انہوں نے کہا کہ دہلی میں ہر طرح سے بہترین نظام موجود تھا لیکن کیجریوال حکومت نے اسے تباہ کر دیا ہے اور ہر روز کسی نہ کسی کی جان جا رہی ہے۔

دہلی کانگریس کے صدر دیویندر یادو نے کہا ہے کہ مانسون کی بارشوں کے دوران ایسا کوئی دن نہیں گزرتا جب کسی نہ کسی حادثے میں لوگوں کی جان نہ گئی ہو۔ گزشتہ روز بھی جہانگیر پوری میں دو منزلہ عمارت گرنے سے ایک خاتون سمیت 3 لوگوں کی موت ہو گئی۔ اس کی ذمہ داری طے کی جائے کہ اس حادثے میں ہونے والی موت کے لیے کون ذمہ دار ہے۔ جہانگیر پوری صنعتی علاقے میں ہوئے حادثے کے بارے میں دہلی میونسپل کارپوریشن انتظامیہ کا کہنا ہے کہ علاقے کو ڈی ڈی اے نے ترقی دی تھی اور ابھی تک میونسپل کارپوریشن کو نالوں اور سڑکوں کی مرمت کا کام نہیں دیا گیا ہے۔ دہلی حکومت اور دہلی میونسپل کارپوریشن آنکھوں پر پٹی باندھ کر بیٹھے ہیں اور راجدھانی میں روزانہ گرنے والی عمارتوں، کرنٹ لگنے اور نالوں میں ڈوب کر لوگوں کی زندگی کا ضیاع ہو رہا ہے۔ انہوں نے کہا کہ حکومت کو جان گنوانے والے افراد کے اہل خانہ کو معاوضہ دینا چاہئے۔

یادو نے الزام لگایا کہ راجدھانی میں مسلسل ہو رہے حادثات کی ذمہ داری کوئی لینے کو تیار نہیں ہے، ہر روز لوگ مر رہے ہیں۔ انہوں نے کہا کہ راجندر نگر بیسمنٹ کوچنگ حادثے پر دہلی کانگریس نے مطالبہ کیا تھا کہ تحقیقات سی بی آئی کے حوالے کی جائے۔ ہم دہلی ہائی کورٹ کے ذریعہ کیس کی تحقیقات سی بی آئی سے کرانے کے حکم کا خیرمقدم کرتے ہیں۔ یادو نے کہا کہ کیا حکومتوں کی غیر ذمہ دارانہ روش اور اپنی ذمہ داری سے بچنے کی صورت میں ہر روز ہو رہی تمام موتوں پر اعلیٰ عدالت کو توجہ دینی ہوگی یا حکومتیں ان معاملات کے بارے میں اپنی ذمہ داری طے کریں گی۔

دیویندر یادو نے کہا کہ راجندر نگر کوچنگ حادثے میں جب عدالت نے واضح کر دیا کہ کسی کو ذمہ داری لینی ہوگی، تو پانی بھرنے، کرنٹ، عمارتوں کے گرنے سے دبنے، نالوں کے کھلے ہونے پر لوگوں کی موت کی ذمہ داری دہلی کی حکومتوں اور ایجنسیوں کو لینی چاہئے۔ انہوں نے کہا کہ پچھلے ایک ماہ سے بھی زیادہ وقت سے بی جے پی اور عام آدمی پارٹی لوگوں کی موت پر سیاست کر رہی ہیں، جو بہت ہی تشویش ناک ہے۔ انہوں نے کہا کہ میور وہار فیز 3 کے کھلے نالے میں ماں بیٹے کی گرنے سے موت پر عام آدمی پارٹی کا راج نواس پر مظاہرہ کرنا اور دہلی میں دیگر حادثات پر بی جے پی کا دہلی حکومت کے خلاف دھرنا دینا محض سیاست ہے، حکومتوں کو اپنے فرائض سمجھ کر حادثات نہ ہوں، اس کے لیے مناسب انتظامات کرنے چاہئے۔

دیویندر یادو نے کہا، ’’کانگریس کی حکومت نے 15 سالوں میں راجدھانی کو ترقی دے کر انفراسٹرکچر قائم کیا تھا لیکن موجودہ حکومت اس کی دیکھ بھال اور مرمت نہیں کر پائی اور پچھلے 10 سالوں میں موجودہ حکومت نے راجدھانی کے سڑک، ٹرانسپورٹ، تعلیم، صحت، عمارتوں، نالوں سمیت پورے انفراسٹرکچر کو تباہ کر دیا ہے۔ عالمی سطح پر دہلی کی ترقی حکومتوں کی سست روی، نااہلی اور بدلے کی سیاست کی وجہ سے سب کچھ بدعنوانی کی بھینٹ چڑھ گیا ہے۔‘‘

دیویندر یادو نے کہا کہ حکومتوں کی سست روی، بڑھتی ہوئی بدعنوانی اور افسران کے سیاسی دباؤ میں کام کرنے کی حالت اور وزیر اعلیٰ کی غیر موجودگی میں دہلی کے لیفٹیننٹ گورنر اور چیف سکریٹری کو دہلی کی بگڑتی ہوئی صورتحال میں ذمہ داری اٹھانے کی ضرورت ہے۔