کانگریس کی ’بھارت جوڑو یاترا‘ 30 جنوری کو کشمیر میں ہوگی اختتام پذیر
کنیا کماری سے کشمیر تک نکالی جا رہی کانگریس کی ’بھارت جوڑو یاترا‘ کا ہفتہ کو آرام کا دن رہا، یہ یاترا آئندہ 30 جنوری کو کشمیر میں اختتام پذیر ہوگی
![تصویر ٹوئٹر / @INCIndia](https://media.assettype.com/qaumiawaz%2F2022-12%2F9e67ba6f-3eac-4dcc-9a43-bbd7d5c48a51%2Fbharat_jodo_yatra.jpg?rect=0%2C67%2C1280%2C720&auto=format%2Ccompress&fmt=webp)
جے پور: کانگریس کے سابق صدر راہل گاندھی کی قیادت میں کنیا کماری سے کشمیر تک نکالی جا رہی کانگریس کی بھارت جوڑو یاترا کا ہفتہ کو آرام کا دن رہا۔ یاترا اتوار کی صبح راجستھان میں دوسہ ضلع سے دوبارہ شروع ہوگی۔ یہ یاترا آئندہ 30 جنوری کو کشمیر میں اختتام پذیر ہوگی۔
کانگریس کے رکن پارلیمنٹ اور کمیونیکیشن انچارج جے رام رمیش کے مطابق 18 دسمبر کی صبح جب یاترا دوبارہ شروع ہوگی تو راہل گاندھی دوپہر میں 45 شہری تنظیموں کے لوگوں سے ملاقات کریں گے۔ یاترا 19 دسمبر کو الور میں ختم ہوگی اور وہاں ایک ریلی کا اہتمام کیا جائے گا۔ بھارت جوڑو یاترا گزشتہ 4 دسمبر کو راجستھان میں داخل ہوئی اور اس دوران آرام کا یہ دوسرا دن ہے جبکہ گزشتہ 9 دسمبر کو بھی آرام کا دن تھا۔
جے رام رمیش نے بتایا کہ بھارت جوڑو یاترا 20 دسمبر کی شام ہریانہ میں داخل ہو جائے گی جو 21 سے 24 دسمبر تک چار دن ہریانہ میں رہے گی۔ اس کے بعد دہلی میں داخل ہوگی۔ انہوں نے بتایا کہ بھارت جوڑو یاترا 2 یا 3 جنوری کو اتر پردیش جائے گی اور پھر دوسرے مرحلے میں ہریانہ میں داخل ہوگی اور پھر پنجاب، جموں اور آخر میں کشمیر پہنچے گی جہاں راہل گاندھی ترنگا لہرائیں گے۔ انہوں نے بتایا کہ یاترا 30 جنوری کو ختم ہوگی۔
انہوں نے بتایا کہ 26 جنوری سے یاترا کا دوسرا مرحلہ شروع ہوگا، جس میں دو ماہ تک ہاتھ سے ہاتھ جوڑو مہم چلائی جائے گی۔ یہ مہم 26 جنوری سے 26 مارچ تک جاری رہے گی۔ انہوں نے بتایا کہ اس مہم میں بوتھ اور بلاک سطح پر بھارت جوڑو ریلیاں نکالی جائیں گی اور ضلع سطح پر کنونشن منعقد کیے جائیں گے، جس کا مقصد بھارت جوڑو یاترا کے پیغام کو مزید پھیلانا ہے۔ جے رام رمیش نے کہا کہ 26 سے 29 دسمبر تک تک اگر پارلیمنٹ کا اجلاس جاری رہا تو راہل گاندھی اجلاس میں بھی شرکت کریں گے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔