کانگریس ورکنگ کمیٹی کا اجلاس پیر کے روز، اہم امور پر تبادلہ خیال متوقع

نئی دہلی: کانگریس کی اعلی ترین پالیسی ساز تنظیم کانگریس ورکنگ کمیٹی کا اجلاس پیر کے روز طلب کیا گیا ہے، جس میں موجودہ سیاسی ماحول کے ساتھ ہی ملک میں سلامتی اور پارٹی کے اندر قیادت کی تبدیلی سے متعلق امور پر تبادلہ خیال کیا جا سکتا ہے۔

کانگریس کے جنرل سکریٹری کے سی وینو گوپال نے ہفتہ کے روز ٹوئٹ کیا کہ یہ اجلاس پیر کے روز صبح گیارہ بجے ویڈیو کانفرنسنگ کے ذریعے منعقد ہوگا۔ انہوں نے اجلاس میں زیر غور آنے والے امور سے متعلق کوئی معلومات نہیں دی، لیکن یہ سمجھا جاتا ہے کہ کچھ لیڈروں کی طرف سے پارٹی کی باگ ڈور کسی نوجوان لیڈرکے حوالے کرنے کا معاملہ بار بار اٹھایا جارہا ہے اور اس اجلاس میں اس پر غور کیا جاسکتا ہے۔

اجلاس کے ایجنڈے کے بارے میں پوچھے جانے پر پارٹی کے ایک سینئر لیڈر نے کہا کہ اجلاس کا کوئی خاص ایجنڈا طے نہیں کیا گیا ہے۔ اس اجلاس میں موجودہ سیاسی حالات، ہندوستانی سرحد میں چین کی دراندازی، ملک میں بے روزگاری، معاشی حالت جیسے عام امور پر تبادلہ خیال متوقع ہے۔ اس میں کووڈ۔19 کی وبا کے دوران انتخابات کے انعقاد کے لئے الیکشن کمیشن کی نئی رہنما ہدایات پر بھی تبادلہ خیال کیا جاسکتا ہے۔

یہ پوچھے جانے پر کہ کیا پارٹی میں قیادت کی تبدیلی کے بارے میں 23 سینئر لیڈر کے دستخط سے کانگریس صدر سونیا گاندھی کو خط لکھے جانے کی اطلاعات ہیں، انہوں نے کہا کہ اس خط پر دستخط کرنے والوں میں ان کا نام بھی شامل کیا گا ہے، حالانکہ انہوں نے ایسے کسی خط پر ابھی تک دستخط نہیں کیے ہیں۔ انہوں نے اس خط کو قیاس آرائی قرار دیتے ہوئے کہا کہ پارٹی کے بیشتر لیڈران پھر سے یہ ذمہ داری راہل گاندھی کے سپرد کرنے کا مطالبہ کر رہے ہیں۔

واضح رہے کہ کانگریس کے سابق صدر راہل گاندھی نے عام انتخابات میں پارٹی کی شکست کی ذمہ داری قبول کرتے ہوئے صدر کے عہدے سے استعفیٰ دے دیا تھا اور اس کے بعد سونیا گاندھی کو دوبارہ صدر منتخب کیا گیا تھا۔ اب راہل گاندھی کو دوبارہ صدر بنانے کا مطالبہ زور پکڑتا جارہا ہے۔ پارٹی کے ترجمان رندیپ سنگھ سورجے والا سمیت بہت سے لوگوں نے پارٹی کے پلیٹ فارم سے کہا ہے کہ راہل گاندھی کو دوبارہ صدر کے عہدے پر فائز کرنے کا مطالبہ زیادہ تر پارٹی لیڈروں کے جذبات کے مطابق ہے۔