راہل گاندھی کا ’دبنگ‘ اسٹائل میں لگا پوسٹر، 2019 میں بی جے پی کو چٹائیں گے دھول

اتر پردیش کے وزیر اعلیٰ یوگی آدتیہ ناتھ کے علاقہ گورکھپور کی سڑکوں پر نئے سال کے پیش نظر راہل گاندھی کے بڑے بڑے پوسٹر لگائے گئے ہیں۔ ان پوسٹروں میں راہل گاندھی کو ’سنگھم اسٹائل‘ میں ایک پولس والے کی وردی میں دکھایا گیا ہے، جو ملک کی حفاظت کے جذبے سے بھرا ہوا ہے۔ پیر کے روز شہر کے چوک چوراہوں پر یہ پوسٹر کانگریس کارکنان نے لگائے ہیں۔ پوسٹر میں راہل گاندھی کو ’جن رکشک‘ یعنی عام لوگوں کا محافظ بتاتے ہوئے کہا گیا ہے کہ ’’راہل گاندھی جی کی سنامی میں، ڈوب گئے جَن وِرودھی پانی میں‘‘۔

گورکھپور کے کانگریس کارکنان نے کیک کاٹ کر نئے سال کا جشن مناتے ہوئے کہا کہ 2019 میں راہل گاندھی ملک کے وزیر اعظم بنیں گے۔ پوسٹر میں راہل گاندھی کو ایک پولس والا دکھایا گیا ہے۔ پوسٹر میں لکھا گیا ہے ’’ریٹرن 2019 جَن رکشک۔ وقت ہے بدلاؤ کا-2019‘‘۔ اس کے نیچے کی لائن میں لکھا ہے ’’میں ملک کی حفاظت کروں گا، یہ ملک میری جان ہے، اس کی حفاظت کے لیے میرا دل اور میری جاں قربان ہے‘‘۔ ٹھیک ان لائنوں کے نیچے بیچ سمندر میں پھنسی ایک کشتی ہے جس پر پی ایم مودی اور امت شاہ کو سوار دکھایا گیا ہے۔کشتی پر سوار یہ دونوں لیڈر کہہ رہے ہیں ’’صاحب اقتدار ہاتھ سے جا رہا ہے۔‘‘ پھر اس کے نیچے لکھا ہے ’’راہل گاندھی جی کی سنامی میں، ڈوب گئے جَن ورودھی پانی میں‘‘۔

کانگریس کارکنان کا کہنا ہے کہ ملک کی عوام کو ٹھگنے والوں کے لیے راہل گاندھی ایک دَبنگ ہیں۔ اس سے پہلے کارکنان نے راہل گاندھی کے پوسٹر کو تلک لگایا اور ان کی آرتی کرانھیں ملک کا آئندہ وزیر اعظم قرار دیتے ہوئے نئے سال 2019 کا کیک کاٹ کر جشن منایا۔