خواتین کے حقوق اور حصہ داری کے لیے کانگریس شعبہ خواتین شروع کرے گی ملک گیر مہم

کانگریس شعبہ خواتین ملک کی نصف آبادی یعنی کہ خواتین کے حقوق و حصہ داری کے لیے ملک گیر مہم شروع کرے گی۔ یہ مہم 29 جولائی سے دہلی کے جنتر منتر سے شروع کی جائے گی جو ملک کی تمام ریاستوں کے دالحکومت سے گزرے گی۔ اس مہم کے مطالبات میں خواتین ریزرویشن بل، مہالکشمی اسکیم کا نفاذ اور خواتین پر مظالم پر روک لگانا شامل ہے۔ یہ اطلاع کانگریس شعبہ خواتین کی صدر الکا لامبا نے دی ہے۔

نئی دہلی میں کانگریس کے صدر دفتر میں ایک پریس کانفرنس سے خطاب کرتے ہوئے کانگریس شعبہ خواتین کی قومی صدر الکا لامبا نے خواتین ریزرویشن کے تعلق سے اہم مہم کے مطالبے سے متعلق کہا کہ ہمارا مطالبہ ہوگا کہ سیاسی انصاف کے تحت 33 فیصد خواتین ریزرویشن بل کو فوری طور پر لاگو کیا جانا چاہیے۔ اس ریزرویشن میں ایس سی-ایس ٹی اور پسماندہ طبقے کی او بی سی بہنوں کی شرکت کو یقینی بناتے ہوئے قانون لاگو کیا جائے۔ انہوں نے کہا کہ جن ریاستوں میں اسمبلی انتخابات ہونے والے ہیں وہاں اس پر مشاورت کرکے لاگو کیا جائے۔

مہالکشمی اسکیم کےنفاذ سے متعلق الکا لامبا نے کہا کہ آج خواتین بڑھتی ہوئی بے روزگاری اور مہنگائی کی شکار ہیں۔ جس کی وجہ سے خواتین کو گھریلو تشدد بھی برداشت کرنا پڑ رہا ہے۔ ہم خواتین کے لیے معاشی انصاف کے تحت مہالکشمی یوجنا کے نفاذ کا مطالبہ کرتے ہیں۔ جس میں ہر غریب خاندان کی ایک خاتون کو سالانہ ایک لاکھ روپے کی مالی امداد دی جائے۔

اس مہم کی تیسرے مطالبے خواتین پر مظالم کے تعلق سے کانگریس شعبہ خواتین کی قومی صدر الکا لامبا نے کہا کہ خواتین کو سماجی انصاف کے تحت تحفظ کا حق ملنا چاہیے۔ انہوں نے کہا کہ بی جے پی حکومت میں خواتین کے خلاف مظالم میں مسلسل اضافہ ہو رہا ہے۔ جرائم پیشہ افراد میں قانون کا خوف ختم ہو رہا ہے۔ ایسی کئی مثالیں ہیں، جو شرمناک ہیں۔ مدھیہ پردیش کے ریوا میں غنڈوں نے دو خواتین کو زندہ دفن کر دیا۔ نئی ممبئی میں 30 سالہ خاتون کے ساتھ اجتماعی عصمت دری کے بعد اسے قتل کر دیا گیا۔ مہاراشٹر کے تھانے میں ایک نو سالہ بچی کی عصمت دری اور پھر قتل کر دیا گیا۔ راجستھان میں چھ ماہ میں خواتین کے خلاف جرائم کے 20 ہزار واقعات رپورٹ ہوئے ہیں۔ انہوں نے کہا کہ  توقع تھی کہ بجٹ میں خواتین کے تحفظ کے لیے محکمہ پولیس میں خواتین کی بھرتی اور فعال خواتین تھانوں کی بات ہوگی لیکن ایسا نہیں ہوا۔ الکا لامبا نے مزید کہا کہ کانگریس مطالبہ کرتی ہے کہ خواتین کے خلاف جرائم کرنے والوں کو سخت سزا دی جائے تاکہ خواتین خود کو محفوظ محسوس کریں۔

الکا لامبا نے کہا کہ کانگریس کی یہ مہم ہر گھر تک پہنچے گی۔ جب تک ہمارے تینوں مطالبات پورے نہیں ہوتے ہم اس مہم کو نہیں روکیں گے۔ خواتین کے حقوق کی یہ آواز ایوان کے باہر اور اندر بھی بلند کی جائے گی۔ انہوں نے مزید کہا کہ دہلی پولیس اس مہم کے لیے مختلف ریاستوں سے آنے والی کانگریس شعبہ خواتین کی عہدیداروں سے فون پر تفتیش کر رہی ہے، ان کے آنے اور قیام کے بارے میں معلومات لے رہی ہے۔ اگر دہلی پولیس یہ سوچ رہی ہے کہ وہ اس مہم کو روک پائے گی تو وہ غلط سوچ رہی ہے۔ ہم گاندھیائی انداز میں سچائی اور عدم تشدد کے راستے پر چلتے ہوئے اپنی آواز بلند کریں گے اور حکومت کو ہماری آواز سننی ہی پڑے گی۔