ہریانہ میں کانگریس کی مکمل اکثریت سے حکومت بنے گی، تفتیشی ایجنسیوں کا غلط استعمال تشویش ناک: کماری شیلجا

فتح آباد (ہریانہ): کانگریس کی رکن اسمبلی کُماری شیلجا نے ہریانہ کے فتح آباد میں ایک انتخابی جلسے سے خطاب کرتے ہوئے عوام سے کانگریس امیدوار کے حق میں ووٹ دینے کی اپیل کی۔ اس موقع پر میڈیا سے بات کرتے ہوئے کُماری شیلجا نے کہا کہ یہ عوامی اجتماع بتاتا ہے کہ ہریانہ میں اس بار کانگریس کی حکومت بننے جا رہی ہے۔ انہوں نے کہا، ’’عوام کی حمایت مل رہی ہے اور ہم مکمل اکثریت کے ساتھ حکومت بنانے جا رہے ہیں۔ مجھے یقین ہے کہ نئی حکومت کے قیام میں اس علاقے کو بھی شمولیت ملے گی، جس سے ترقیاتی کام تیز رفتار سے ہوں گے۔‘‘

انہوں نے مزید کہا کہ مرکزی حکومت مرکزی تفتیشی ایجنسیوں کا غلط استعمال کر رہی ہے اور عدالت نے بھی اس پر سخت تبصرہ کیا ہے۔ یہ حکومت سیاسی انتقام کی سوچ کے تحت کام کر رہی ہے اور تمام آئینی اداروں کو ختم کرنے پر آمادہ ہے۔ کُماری شیلجا نے کہا، ’’میرا خیال ہے کہ ریاست بہ ریاست کانگریس کا گراف بڑھ رہا ہے اور ہم مضبوطی کے ساتھ اقتدار میں واپسی کرنے والے ہیں۔‘‘

بی جے پی حکومت کی ناکامیوں پر روشنی ڈالتے ہوئے کماری سیلجا نے کہا کہ اس حکومت نے ملک اور ریاست کو پسماندہ چھوڑ دیا ہے۔ آج ہر طبقہ مہنگائی، غنڈہ گردی اور کرپشن سے پریشان ہے۔ کسانوں کے ساتھ ساتھ سماج کے ہر طبقے کو اپنے مطالبات کے لیے جبر کا سامنا کرنا پڑا ہے۔ ریاست میں تقریباً دو لاکھ سرکاری ملازمت کے عہدے خالی ہیں، جنہیں کانگریس کی حکومت بننے پر پُر کیا جائے گا۔

قابل ذکر ہے کہ ہریانہ انتخابات کے دوران سابق وزیر اعلیٰ منوہر لال کھٹر نے کماری سیلجا کو بی جے پی میں شامل ہونے کی تجویز دی تھی۔ اس کا جواب دیتے ہوئے کانگریس نے کہا کہ بی جے پی کو پہلے اپنا گھر سنبھالنا چاہیے، ہم سب مل کر الیکشن لڑ رہے ہیں۔

خیال رہے کہ ہریانہ کی تمام 90 اسمبلی سیٹوں کے لیے 5 اکتوبر کو ووٹنگ ہونی ہے۔ 8 اکتوبر کو ووٹوں کی گنتی کی جائے گی اور اسی دن نتائج کا اعلان کر دیا جائے گا۔