چائے پر چرچا کر کے کانگریس کے ریاستی صدر نے عوام کی نبض کو ٹٹولا

اگلے سال ہونے والے لوک سبھا انتخابات سے پہلے اترپردیش میں کانگریس کی سوکھی جڑوں کی آبیاری کرنے کی ہر ممکن کوشش میں مصروف نومنتخب صدر اجئے رائے نے پیر کو یہاں بھیڑ بھرے لال باغ چوراہے پر واقع ایک چائے کی دوکان پر عوام سے ملاقات کی اور موجودہ حالات میں ان کی رائے طلب کی۔

رائے آج شام یہاں پہلے سے طے شدہ پروگرام کے مطابق لال باغ چوراہے پر واقع شرما جی کی چائے کی دوکان پر پہنچے اور موجود لوگوں کوموجودہ مسائل کا حوالہ دیتے ہوئے ان کی رائے جاننے کی کوشش کی۔

انہوں نے بجلی، پانی، صحت، مہنگائی، بے روزگار، کسانوں کے مسائل، فاقہ کشی اور ریاست کے خستہ حال نظم ونسق پر لوگوں کی رائے و تجاویز طلب کیں۔ پارٹی کا دعوہ ہے کہ وہاں موجود لوگوں نے مہنگائی، خواتین نے اپنی سیکورٹی نہ ہونے، نوجوانوں نے روزگار نہ ملنے کی وجہ بے روزگاری اور گھریلو خواتین  نے رسوئی گیس اور گھریلو بجلی کے اضافے سے ان کے بجٹ بگاڑنے جیسی اہم باتیں کانگریس ریاستی صدر کے سامنے رکھیں۔

رائے نے کہا کہ بی جے پی حکومت ہر محاذ پر فیل ہے۔ ریاست میں جنگل راج قائم ہے قانون نام کی کوئی چیز نہیں بچی ہے۔ انہوں نے کہا کہ آگے کی چرچا باٹی چوکھا، پکوڑی اور دیگر چیزوں پر بھی عوام کے درمیان جاکے ہوگی۔ انہوں نے کہا کہ بی جے پی نے عوام سے جو وعدے کیا اسے وفا نہ کیا۔ سی بی آئی اور ای ڈی کے ذریعہ اپوزیشن کو ڈرا رہے ہیں۔ ابھی حال میں ہونے والے پانچ ریاستوں کے انتخابات میں کانگریس مکمل اکثریت سے حکومت بنائے گی۔