بلقیس بانو عصمت دری کے مجرموں کو معافی کے معاملہ پر کانگریس نے کہا- ’یہ نہ مٹنے والا داغ ہے‘

ایک دن بعد جب گجرات حکومت نے سپریم کورٹ کو بتایا کہ اس نے مارچ 2002 کے بلقیس بانو کیس میں عمر قید کے 11 مجرموں کو معافی دینے سے پہلے مرکز کی رضامندی حاصل کر لی تھی ،کانگریس نے اس اقدام کو حکمراں نظام کو ایسا داغ قرار دیا ہے جو  کبھی نہ مٹنے والا ہے۔

انگریزی اخبار ’دی ٹربیون‘ میں شائع خبر کے مطابق مرکزی وزیر پرہلاد جوشی نے ایک ٹی وی چینل سے بات کرتے ہوئے فیصلہ کا دفاع کرتے ہوئے  کہا کہ سب کچھ قانون کے مطابق کیا گیا ہے۔ وزیر کا حوالہ 9 جولائی 1992 کو معافی کی نرم پالیسی کی طرف تھا جو 2014 کی پالیسی کے مقابلے میں گھناؤنے جرائم کے لیے کوئی رعایت نہیں رکھتا۔ انہوں نے کہا  کہ انہیں  اس میں کچھ غلط نہیں لگتا کیونکہ یہ قانون کے عمل کے مطابق ہوا ہے۔ ان تمام مجرموں کی رہائی  کی گئی  ہے جنہوں نے مقررہ وقت جیل میں گزارا ہے۔

کانگریس کے ابھیشیک منو سنگھوی نے کہا کہ قابل مذمت ہے کہ ایک منتخب حکومت نے ایسے  طریقے سے مجرموں کو رہا کرنے کا انتخاب کیا۔ یہ اس حکومت پر ایک ایسا داغ ہے جو کبھی نہیں دھل پائے گا۔

کانگریس کے سابق صدر راہل گاندھی نے کہا کہ لال قلعہ کی فصیل سے خواتین کے احترام کی باتیں کی جاتی ہیں لیکن حقیقت میں ’ریپسٹ‘ کی حمایت… وزیراعظم کے وعدوں اور ارادوں میں فرق واضح کرتا  ہے۔

جیسے ہی مجرموں کی رہائی پر سیاسی  بوا ل شروع  ہوا، عدالت عظمیٰ نے معافی کو چیلنج کرنے والی درخواستوں پر گجرات حکومت کے 458 صفحات پر مشتمل جواب کو "بڑا اور موٹا" قرار دیا، اور  کہا  کہ ان میں حقائق پر مبنی بیانات نہیں تھے۔ عرضی گزاروں کو جواب دینے کے لیے وقت دیتے ہوئے، سپریم کورٹ نے اس معاملے کی سماعت 29 نومبر کے لیے کر دی۔

اس وقت حاملہ بانو کے ساتھ 3 مارچ 2002 کو گجرات فسادات کے بعد اجتماعی عصمت دری کی گئی۔ اس کی نابالغ بیٹی سمیت اس کے خاندان کے سات افراد کو قتل کر دیا گیا۔

سی بی آئی نے معاملے کی تحقیقات کی تھی اور 21 جنوری 2008 کو ممبئی کی ایک خصوصی سی بی آئی عدالت نے 11 افراد کو عمر قید کی سزا سنائی تھی۔ کانگریس نے آج عدالت عظمیٰ میں گجرات حکومت کے اس جواب پر استثنیٰ لیا کہ وزارت داخلہ نے 11 جولائی 2022 کے خط میں مجرموں کی قبل از وقت رہائی کی منظوری دی تھی حالانکہ اسے معلوم تھا کہ اس تجویز کی مخالفت پولیس سپرنٹنڈنٹ، سی بی آئی، اسپیشل کرائم نے کی تھی۔

ابھیشیک منو سنگھوی نے الزام لگایا کہ جب 15 اگست کو مجرموں کو رہا کیا گیا تو حکومت نے جان بوجھ کر خاموشی اختیار کر رکھی تھی اور اب صرف سپریم کورٹ کے احکامات کی وجہ سے اس نے انکشاف کیا ہے کہ وزارت داخلہ نے حقیقت میں رہائی کی منظوری دی تھی۔ سنگھوی نے مزید کہا کہ حکومت کے لئے صرف سیاسی فائدہ ہے ۔

جسٹس اجے رستوگی کی سربراہی میں سپریم کورٹ کی بنچ نے  کہا  کہ عدالت کو کوئی جوابی حلف نامہ نہیں ملا   اور اس پر حقیقت پر مبنی بیان دینا چاہئے تھا۔

سالیسٹر جنرل تشار مہتا نے بھی سپریم کورٹ کے مشاہدات سے اتفاق کیا کہ کئی فیصلوں کا حوالہ دیا گیا ہے اور کوئی جوابی حلف نامہ نہیں  ہے۔ "فیصلوں کا ذکر آسان حوالہ کے لیے کیا گیا تھا، اس سے بچا جا سکتا تھا۔‘‘