نفرت پھیلانے کے لئے بی جے پی فیسبک کا استعمال کررہی ہے:کانگریس

کانگریس نے امریکہ کے مشہور اخبار میں شائع ایک مضمون کا حوالہ دیتے ہوئے بھارتیہ جنتا پارٹی (بی جے پی) پر حملہ کرتے ہوئے الزام لگایا کہ وہ فیسبک اور واٹس ایپ جیسے سوشل میڈیا کااستعمال کرکے ملک میں نفرت پھیلا کر سیاسی ایجنڈے پر کام کررہی ہے۔

کانگریس ترجمان اجے ماکن نے نامہ نگاروں کے خصوصی کانفرنس میں اسے سنگین صورت حال قراردیااور کہا کہ معاملے کی جانچ کرکے ملک کو توڑنے کی سازش کرنے والے فیسبک کے افسران کے خلاف سخت کارروائی کی جانی چاہئے۔

انہوں نے کہاکہ مضمون کے مطابق اس جرم میں فیسبک کے ہندوستانی افسران ملوث ہیں اور ان کی شناخت کرکے ان کے خلاف مقدمہ دائر کیا جانا چاہئے۔

انہوں نے کہا کہ امریکی اخبار وال اسٹریٹ جرنل نے اپنے پہلے صفحہ پر شائع اس مضمون میں کہا ہے کہ بی جے پی سوشل میڈیا کا اپنے مفاد میں بخوبی استعمال کرکے ملک میں نفرت کا ماحول پیدا کرکے سیاسی فائدہ حاصل کررہی ہے۔

اخبار نے کہاہے کہ چار افسران کے اس میں ملوث ہونے کی فیسبک واچ ٹیم نے شناخت کرکے ان کو ہٹانے کی سفارش کی تو فیسبک کے ہندوستانی اعلی افسر نے یہ کہتے ہوئے انہیں ہٹانے سے انکار کردیا کہ اس سے کمپنی کا کام متاثر ہوگا۔

مسٹر ماکن نے سوال کیا کہ فیسبک اور واٹس ایپ سے جڑے ان افسران نے کس مقصد سے نفرت کا ماحول پھیلانے اوردنگے بھڑکانے میں مدد کرکے بی جے پی کوانتخابات میں فائدہ پہنچانے کا کام کیا ہے۔ اس کا خلاصہ ہونا چاہئے کہ فیسبک کے ان افسران کے بی جے پی سے کیا رشتے ہیں۔