گوا: راہل نے کی منوہر پاریکر کی عیادت، جلد صحتیابی کے لئے دیں نیک خواہشات

کانگریس صدر راہل گاندھی منگل کے روز اچانک گوا اسمبلی پہنچے اور انہوں نے گوا کے علیل چل وزیر اعلیٰ منوہر پاریکر کی عیادت کی۔ گوا میں حزب اختلاف کے قائد چندر کانت کولیکر نے کہا، ’’راہل نے وزیر اعلی منوہر پاریکر سے ملاقات کی۔ وہ پانچ منٹ تک ان کے پاس موجود رہے اور ان کا حال چال جانا۔‘‘

یہ پوچھے جانے پر کہ کیا راہل گاندھی نے رافیل آڈیو ٹیپ کو لے کر بات چیت کی تو کولیکر نے کہا، ’’یہ ایک ذاتی ملاقات تھی، اس معاملہ پر بات نہیں ہوئی۔ راہل گاندھی اگلے مہینے گوا کا باضابطہ دورہ کر سکتے ہیں۔‘‘ راہل گاندھی نے گوا میں کانگریس ارکان اسمبلی سے بھی ملاقات کی۔

وزیر اعلی منوہر پاریکر سے ملاقات کے بعد کانگریس صدر راہل گاندھی نے ٹوئٹ میں کہا، ’’میں صبح کے وقت گوا کے وزیر اعلیٰ سے ملاقات کے لئے گیا تھا۔ ان سے ملاقات کر کے جلد صحتیابی کے لئے نیک خواہشات دیں، یہ ایک ذاتی ملاقات تھی۔‘‘

راہل گاندھی نے گوا کے وزیر اعلیٰ منوہر پاریکر سے ایسے وقت میں ملاقات کی ہے جب کچھ روز قبل ہی انہوں نے رافیل معاملہ کو لے ایک ایک ٹوئٹ کیا تھا اور پاریکر کے حوالہ سے بڑا دعوی کیا تھا۔ کانگریس صدر نے ٹوئٹ میں کہا تھا ’’سابق وزیر دفاع (منوہر پاریکر) کے پاس رافیل سودے کے حوالہ سے ’دھماکہ خیز دستاویز‘ موجود ہیں، جس سے انہوں نے وزیر اعظم مودی پر پکڑ بنائی ہوئی ہے۔‘‘

انہوں نے یہ بھی کہا تھا کہ آڈیو ٹیپ میں وزیر صحت وشوجیت رانے سے کسی کو یہ کہتے بھی سنا گیا تھا کہ پاریکر کے پاس رافیل کی اصل فائلیں موجود ہیں، یہی وجہ ہے کہ پاریکر کی قیادت والی انتظامیہ جانچ نہیں کرا رہی ہے۔

غور طلب ہے کہ کانگریس صدر راہل گاندھی اپنی والدہ اور یو پی اے کی چیئر پرسن سونیا گاندھی کے ساتھ ہفتہ کے روز سے گوا کے نجی دورے پر گئے ہوئے ہیں۔