ہریانہ: میوات کی تمام سیٹوں پر کانگریس کا قبضہ، تین مسلم امیدوار کامیاب

ہریانہ کے مسلم اکثریتی ضلع نوح (میوات ) میں کانگریس امیدواروں نے شاندار کارکردگی کا مظاہرہ کیا ہے اور یہاں کی تینوں سیٹوں سے اس کے امیدوار جیت گئے ہیں۔ کانگریس کے جیتنے والے تمام امیدوار مسلمان ہیں اور ’میو برادری ‘ سے تعلق رکھتے ہیں۔

سال 2014 کے اسمبلی انتخابات میں میوات کی دو سیٹوں پر آئی این ایل ڈی (انڈین نیشنل لوک دل) جبکہ ایک سیٹ پر آزاد امیدوار نے کامیابی حاصل کی تھی۔ بی جے پی نے میوات سے دو مسلم امیدوار کو میدان میں اتارا تھا اور دونوں کو ہی ہار کا سامنا کرنا پڑا ہے۔

نوح

نوح اسمبلی سیٹ سے بی جے پی نے حال ہی میں آئی این ایل ڈی کا ساتھ چھوڑ کر آنے والے یاسین خان خاندان سے تعلق رکھنے والے ذاکر حسین کو امیدوار بنایا تھا۔ ذاکر حسین کو کانگریس کے آفتاب احمد نے 4038 ووٹوں سے شکست دی ہے۔ واضح رہے کہ 2014 کے اسمبلی انتخابات میں ذاکر حسین نے آفتاب احمد کو 32796 ووٹوں سے ہرایا تھا۔

فیروز پور جھرکہ

فیروز پور جھرکہ سیٹ پر کانگریس نے ممن خان نے جیت حاصل کی ہے اور بی جے پی کے امیدوار نسیم احمد کو 37004 ووٹوں سے ہرایا ہے ۔ نسیم احمد نے سال 2014 میں آئی این ایل ڈی امیدوار کے طور پر انتخاب لڑا تھا اور جیت حاصل کی تھی۔

پونہانہ

میوات کی پونہانہ سیٹ سے کانگریس کے محمد الیاس نے جیت حاصل کی ہے۔ انہوں نے آزاد امیدوار اور موجودہ رکن اسمبلی رئیس خان کو محض 816 ووٹوں سے شکست دی۔ واضح رہے کہ رئیس خان 2014 میں آزاد امیدوار کے طور پر انتخابی میدان میں اترے تھے اور انہوں نے محمد الیاس کو شکست دی تھی۔ بعد میں وہ بی جے پی میں شامل ہو گئے لیکن بی جے پی نے انہیں اس بار امیدوار نہیں بنایا۔ رئیس خان اس کے بعد آزاد امیدوار کے طور پر میدان میں اترے اور محمد الیاس کو سخت ٹکر دی۔