سرکاری اسکیموں کا فائدہ اقلیتوں تک پہنچے: ندیم جاوید

آل انڈیا کانگریس پارٹی کےشعبہ اقلیتی امور کے سربراہ ندیم جاوید نے کانگریسیوں سے کہاکہ انہیں مختلف سرکاری اسکیموں کا اقلیتوں کوفائدہ پہنچانے میں اہم رول ادا کرناچاہئے۔ ان اسکیموں سے انہیں متعارف کروایا جائے اور اس کے لیے آگے بڑھ کر مدد کی جائے۔

آل انڈیا کانگریس کمیٹی کے اقلیتی شعبہ کے سربراہ جاویدندیم نے ان خیلات کا اظہار اقلیتی شعبے کی میٹنگ میں کیا۔اس تقریب کے دوران کانگریس کے ریاستی صدر نانا پٹولے ، نائب صدراور اقلیتی شعبہ کے ریاستی صدر ایم ایم شیخ ، کانگریس اقلیتی شعبہ کے ریاست بھر کے اضلاع کے سربراہان اور دیگر نے شرکت کی ۔ ندیم جاوید نے اس موقع پر کہا کہ اقلیتوں کا مکمل اعتماد حاصل کرنے کیلئے اقلیتی شعبہ جنگی پیمانے پر کام کرے گا ۔

انہوں نے اس موقع پر چند نام نہاد مسلم سیاسی پارٹیوں کا بھی تذکرہ کیا اور کہا کہ یہ پارٹیاں صرف مسلمانوں کی صفوں میں انتشار پیدا کرنے کی نیت سے مسلم ووٹوں کا بٹوارہ کر کے اپنافائدہ حاصل کررہی ہیں ۔

اس موقع پر کانگریس کے ریا ستی صدرانا پٹولے نے مجلس اتحاد المسلمین پر تنقیدکرتے ہوئے کہا کہ ایم آئی ایم بی جے پی کی' بی ٹیم' ہے اور اس کی وجہ سے سیکولر طاقتوں کو نہ صرف نقصان پہنچاہے، بلکہ مسلم نمائندگی بھی دن بہ دن کم ہوتی جا رہی ہے ۔

انہوں نے مزید کہا کہ آئندہ دنوں میں کانگریس پارٹی نے صرف ریاست میں اپنا کھویا ہوا وقار حاصل کرنے میں کامیاب ہوجائے گیاور اس کا شمار ملک کی اور ریاست کی اول نمبر پارٹیوں میں ہو گا،لیکن یہ اس وقت ممکن ہو جب تمام طبقات کا اسے بھر پور تعاون ملے اوراقلیتوں نے ماضی میں جو اعتماد کانگریس پارٹی پر جتلا یا ہے وہ اس پر قائم رہے ۔

پٹولے نےمزید کہا کہ اقلیتوں کے مسائل کو حکومت تک پہنچانا اور اس پر عمل درامد کرنا اب ہماری ذمہ داری ہے ۔ اس موقع پر ریاستی کانگریس کے نائب صدر اور اقلیتی شعبہ کے ریاستی سربراہ ایم ایم شیخ نے کہا کہ ان ریاست کے تمام اضلاع کے سیل کے سربراہان اس میں موجود ہیں مگر اب ان کی یہ ذمہ داری ہے کہ وہ اقلیتوں کے مسائل کو حل کرنے کیلئے دوبارہ متحرک ہو جا ئیں ۔

انہوں نے کہا کہ انہیں اس بات کی خوشی ہے کہ کانگریس پارٹی نے ایک جانب جہاں انہیں ریاستی کانگریس کے نائب صدر کی ذمہ داری دی ہے وہیں اقلیتی شعبہ کے سربراہ کے عہدے پر بھی قائم رکھا ہے۔

اس موقع پر ابراھیم بھائی جان، رکن اسمبلی وجاہت مرز ا،ایم ایل سی حسنہ بانو، نائب صدر موہن جوشی،نظام الدین راعین وغیرہ موجود تھے ۔