پنجاب اسمبلی انتخاب: کانگریس نے کئی کمیٹیاں تشکیل دیں، امبیکا سونی، اجے ماکن اور سنیل جاکھڑ کو ملی بڑی ذمہ داری

کانگریس نے پنجاب اسمبلی انتخاب کے لیے پوری طرح کمر کس لی ہے۔ اسی کے مدنظر کانگریس صدر سونیا گاندھی نے آج پنجاب انتخاب کے لیے کئی اہم کمیٹیوں کی تشکیل کی ہے۔ اس میں اجے ماکن کی صدارت میں اسکریننگ کمیٹی کی تشکیل ہوئی ہے، ساتھ ہی امبیکا سونی کو انتخابی کوآرڈنیشن کمیٹی کی صدر اور سنیل جاکھڑ کو انتخابی مہم کمیٹی کا صدر بنایا گیا ہے۔ اس کے علاوہ پرتاپ سنگھ باجوا کو پنجاب انتخابات کے لیے منشور کمیٹی کا سربراہ مقرر کیا گیا ہے۔

کانگریس تنظیم جنرل سکریٹری کے سی وینوگوپال نے پیر کے روز اس سلسلے میں جانکاری دیتے ہوئے کہا کہ پنجاب کے سابق ریاستی صدر سنیل جاکھڑ کو انتخابی مہم کمیٹی کا سربراہ مقرر کیا گیا ہے۔ ان کے علاوہ کانگریس صدر نے اسکریننگ کمیٹی میں چندن یادو اور کرشنا الاورو کو رکن مقرر کیا ہے۔ وزیر اعلیٰ چرنجیت سنگھ چنّی، ریاستی کانگریس صدر نوجوت سنگھ سدھو، انتخابی تشہیر کمیٹی کے چیئرمین سنیل جاکھڑ، پنجاب امور کے انچارج ہریش چودھری اور کانگریس کے قومی سکریٹری اور پنجاب انچارج بھی اس کے رکن ہوں گے۔

اس سے قبل پنجاب کانگریس کے سربراہ نوجوت سنگھ سدھو نے ان تقرریوں کے مسئلہ پر تین دسمبر کو کانگریس کے سابق صدر راہل گاندھی سے ملاقات کر انتخاب سے متعلق کمیٹیوں کی تشکیل کے بارے میں تبادلہ خیال کیا تھا۔ یکم دسمبر کو پنجاب کے وزیر اعلیٰ چرنجیت سنگھ چنّی، نوجوت سدھو اور سنیل جاکھڑ نے بھی دہلی پہنچ کر راہل گاندھی کے ساتھ میٹنگ کی تھی۔

غور طلب ہے کہ پنجاب میں اگلے سال کی شروعات میں اسمبلی انتخاب ہونے ہیں۔ برسراقتدار کانگریس کو انتخاب میں عام آدمی پارٹی (عآپ)، اکالی دل، بی جے پی اور امرندر سنگھ کی نئی پارٹی کی جانب سے چیلنج ملنے کی امید لگائی جا رہی ہے۔ نئی پارٹی بنانے کا اعلان کرنے والے سابق وزیر اعلیٰ امرندر سنگھ نے آج ہی بی جے پی کے ساتھ سیٹ سمجھوتہ کر انتخاب لڑنے کا اعلان کیا ہے۔