کانگریس نے یو پی اسمبلی انتخاب کے لیے 5 کمیٹیاں تشکیل دی، پی ایل پونیا کو ملی انتخابی مہم کمیٹی کی ذمہ داری

اتر پردیش میں آئندہ سال ہونے والے اسمبلی انتخاب کو لے کر کانگریس میں سرگرمی کافی تیز ہو چلی ہے۔ دراصل کانگریس نے جمعہ کو یو پی انتخاب کے لیے انتخابی مہم کمیٹی سمیت پانچ اہم کمیٹیاں تشکیل دی ہیں۔ اس میں کانگریس کے سینئر لیڈر پی ایل پونیا کو بڑی ذمہ داری دیتے ہوئے یو پی انتخابی مہم کمیٹی کا سربراہ بنایا ہے۔ سابق مرکزی وزیر سلمان خورشید پر بھروسہ ظاہر کرتے ہوئے انھیں منشور کمیٹی کی ذمہ داری دی گئی ہے۔

کانگریس کے تنظیمی جنرل سکریٹری کے سی وینوگوپال کی جانب سے جاری بیان کے مطابق یو پی انتخاب کے لیے پی ایل پونیا کی قیادت میں انتخابی مہم کمیٹی، سابق مرکزی وزیر سلمان خورشید کی قیادت میں منشور کمیٹی، سابق رکن پارلیمنٹ راجیش مشرا کی صدارت میں انتخابی پالیسی اور منصوبہ کمیٹی، سابق ریاستی صدر نرمل کھتری کی قیادت میں انتخاب کو آرڈنیشن کمیٹی اور آچاریہ پرمود کرشنم کی قیادت میں فرد جرم کمیٹی کی تشکیل کی گئی ہے۔

اس کے علاوہ کانگریس نے سینئر لیڈروں راجیو شکلا، بیگم نور بانو، ظفر علی نقوی کو انتخاب کو آرڈنیشن کمیٹی، آرادھنا مشرا، وویک بنسل کو منشور کمیٹی میں شامل کیا ہے۔ ان کے علاوہ یو پی انتخاب کے لیے بنی دیگر کمیٹیوں میں کانگریس کے ریاستی سطح کے لیڈروں کےس اتھ ہی کئی مرکزی لیڈروں کو بھی جگہ دی گئی ہے۔

پارٹی نے ریاستی کانگریس کمیٹی میں کئی نئے عہدیداروں کی تقرری بھی کی ہے۔ ان میں اوپیندر سنگھ، مقصود خان اور جیونت سنگھ کو ریاستی کانگریس کمیٹی کا نائب سربراہ مقرر کیا گیا ہے۔ علاوہ ازیں دنیش کمار سنگھ کو تنظیمی جنرل سکریٹری بنایا گیا ہے۔ ان کے علاوہ 12 جنرل سکریٹری اور 31 سکریٹری کی بھی تقرری ہوئی ہے۔