مہاراشٹرا کی اعلی آئی پی ایس افسر رشمی شکلا کے خلاف فوری کارروائی کی جائے: کانگریس

انتخابی ضابطۂ اخلاق کے نفاذ کے دوران آئی پی ایس افسر رشمی شکلا کی نائب وزیر اعلیٰ دیویندر فڑنویس سے ملاقات پر سخت اعتراض کرتے ہوئے مہاراشٹر کانگریس کے چیف ترجمان اتل لونڈھے نے انتخابی کمیشن سے مطالبہ کیا ہے کہ وہ اس خلاف ورزی کا فوری نوٹس لے اور رشمی شکلا کے خلاف سخت کارروائی کرے۔

اتل لونڈھے نے کہا کہ تلنگانہ میں بھی ایک پولیس افسر نے انتخابی ضابطۂ اخلاق کے دوران ایک وزیر سے ملاقات کی تھی، جس پر انتخابی کمیشن نے فوری کارروائی کی تھی۔ لیکن سوال یہ پیدا ہوتا ہے کہ کیا انتخابی کمیشن صرف غیر بی جے پی ریاستوں میں ہی سختی کرتا ہے؟ کیا بی جے پی حکومت والی ریاستوں میں اسے ضابطہ اخلاق کی خلاف ورزیاں نظر نہیں آتیں؟ یہ دوہرے معیار کا سوال ہے، جو جمہوری اقدار کے لیے نقصان دہ ہے۔

اتل لونڈھے نے مزید کہا کہ رشمی شکلا پر پہلے بھی اپوزیشن رہنماؤں کے فون ٹیپ کرنے جیسے سنگین الزامات لگ چکے ہیں۔ کانگریس پارٹی کے مطالبے پر انہیں پولیس ڈائریکٹر جنرل کے عہدے سے ہٹایا گیا تھا، لیکن اب انتخابی عمل کے دوران ان کی وزیر داخلہ سے ملاقات انتخابی ضابطۂ اخلاق کی کھلی خلاف ورزی ہے۔

اتل نے کہا کہ ایسے اقدامات انتخابی شفافیت پر سوالیہ نشان کھڑا کرتے ہیں، اور انتخابی کمیشن کو چاہئے کہ وہ فوری طور پر رشمی شکلا کے خلاف کارروائی کرے تاکہ جمہوری عمل پر عوام کا اعتماد بحال رہے۔