ہریانہ میں کانگریس کی دوسری فہرست جاری، بنسی لال کے پوتے اور پوتی آمنے سامنے

کانگریس نے ہریانہ اسمبلی انتخابات کے لیے اپنے امیدواروں کی دوسری فہرست جاری کر دی ہے۔ پارٹی نے اپنی دوسری فہرست میں نو امیدواروں کے ناموں کا اعلان کیا ہے۔ اس سے قبل جمعہ کو کانگریس نے 32 امیدواروں کے ناموں کا اعلان کیا تھا۔ اب کانگریس نے ہریانہ میں اب تک  اپنے کل 41 امیدواروں کے ناموں کا اعلان کر دیا ہے۔

کانگریس نے اپنی دوسری فہرست میں تھانیسر سے اشوک اروڑہ، گنور سے کلدیپ شرما، اوچنا کلاں سے برجیندر سنگھ، ٹوہانہ سے پرم ویر سنگھ، توشام سے انیرودھ چودھری، میہم سے بلرام ڈانگی، ننگل سے منجو چودھری، بادشاہ پور سے وردھن یادو اور گروگرام سے موہت گروور کو ٹکٹ دیا ہے۔

دوسری فہرست میں جن نو امیدواروں کا اعلان کیا گیا ہے، ان میں سب سے بڑا نام سابق ایم پی برجیندر سنگھ کا ہے۔ برجیندر سنگھ، جو چودھری بیرندر کے بیٹے ہیں اور حصار سے ایم پی رہ چکے ہیں، کو اوچنا کلاں سیٹ سے سابق نائب وزیر اعلیٰ دشینت چوٹالہ کے خلاف میدان میں اتارا گیا ہے۔ لوک سبھا انتخابات سے پہلے چودھری باپ بیٹے نے بی جے پی چھوڑ کر کانگریس میں گھر واپس آ گئے تھے۔

انیرودھ چودھری کو توشام سے کرن چودھری کی بیٹی شروتی چودھری کے خلاف ٹکٹ ہے۔ انیرودھ سابق وزیر اعلیٰ بنسی لال کے پوتے ہیں۔ اس کا مطلب ہے کہ اس سیٹ پر بنسی لال کے پوتے اور پوتی کے درمیان مقابلہ ہوگا۔ موہت گروور کو گروگرام سے اور وردھن یادو کو بادشاہ پور سے میدان میں اتارا گیا ہے۔ دونوں پارٹی کے نوجوان چہرے ہیں۔ اس کے علاوہ گنور سے کلدیپ شرما اور تھانیسر سے اشوک اروڑہ کو ٹکٹ دیا ہے۔ کانگریس نے ٹوہانہ سے پرم ویر سنگھ اور میہم سے بلرام ڈانگی کو میدان میں اتارا ہے۔

ہریانہ کی 90 اسمبلی سیٹوں میں سے کانگریس نے اب تک 41 سیٹوں کے لیے امیدواروں کے ناموں کا اعلان کیا ہے۔ اس سے قبل 6 ستمبر کو کانگریس نے دو فہرستیں جاری کی تھیں اور کل 32 امیدواروں کے ناموں کا اعلان کیا تھا۔ پہلی فہرست میں کانگریس نے ریاست کی کئی اہم سیٹوں کے لیے امیدواروں کے ناموں کا اعلان کیا تھا۔

پہلی فہرست میں کانگریس نے سابق وزیر اعلی بھوپندر سنگھ ہڈا کو جگہ دی ہے، اس بار وہ گڑھی سامپلا کلوئی سیٹ سے قسمت آزمائیں گے۔ اس کے علاوہ پارٹی نے پہلوانی  کے ذریعہ سیاست میں آنے والی ونیش پھوگاٹ کو جولانہ سیٹ سے امیدوار بنایا ہے۔

پہلی فہرست میں کانگریس نے نوح اسمبلی سیٹ سے آفتاب احمد، پنہنا سے محمد الیاس، فیروز پور جھرکہ سے ممن خان انجینئر، ریواڑی سیٹ سے چرنجیو راؤ اور سدھورا سے رینو بالا کو انتخابی جنگ میں اتارا ہے۔واضح رہے کہ اگلے ماہ 5 اکتوبر کو ہریانہ کی 90 اسمبلی سیٹوں پر ایک ہی مرحلے میں انتخابات ہوں گے۔ جبکہ تمام نشستوں پر ووٹوں کی گنتی 8 اکتوبر کو ہوگی۔ اسمبلی انتخابات میں ایک ماہ سے بھی کم وقت باقی ہے، ایسے میں کانگریس اپنی انتخابی تیاریوں میں کوئی کسر نہیں چھوڑنا چاہتی ہے۔