مہنگائی بھتہ روکنے کے خلاف کانگریس مرکز پر حملہ آور، راہل نے کہا ’لوٹ جرم ہے‘

نئی دہلی: فوجیوں، سرکاری ملازمین اور پنشنرس کا مہنگائی بھتہ روکے جانے سے متعلق کانگریس نے آج مرکز کی مودی حکومت کو پرزور طریقے سے تنقید کا نشانہ بنایا۔ ایک طرف کانگریس کے سابق صدر راہل گاندھی نے ٹوئٹ کر کے ٹی اے اور ڈی اے ریلیز نہ کیے جانے کے عمل کو ’لوٹ‘ قرار دیا اور کہا کہ یہ کسی جرم سے کم نہیں ہے، اور دوسری طرف کانگریس کے سینئر لیڈر ابھشیک منو سنگھوی نے پریس کانفرنس کے ذریعہ مہنگائی بھتہ روکے جانے کو دھوکہ سے تعبیر کیا۔

راہل گاندھی نے اپنے ٹوئٹ میں سرکاری ملازمین کو ٹی اے/ڈی اے نہ دیے جانے کو ’کمائی چھیننا‘ ٹھہرایا اور لکھا کہ ’’کووڈ وبا میں بھی ملک کی خدمت میں مصروف 113 لاکھ ملازمین کی ہمت بڑھانے کی جگہ مرکزی حکومت ان کی محنت کی کمائی چھیننے میں لگی ہے۔‘‘ انھوں نے مزید لکھا کہ ’’فوجیوں، سرکاری ملازمین اور پنشنرس سے 37500 کروڑ روپے کی لوٹ کرنا جرم ہے۔‘‘

کانگریس کے ترجمان ابھشیک منو سنگھوی نے اس تعلق سے اپنے بیان میں کہا کہ ’’حکومت نے مرکزی اہلکاروں کا مہنگائی بھتہ روک کر 115 لاکھ سے زائد اہلکاروں کے ساتھ دھوکہ کرکے کروڑوں شہریوں کے حق کو مارا ہے۔‘‘ انھوں نے اپنی بات کو آگے بڑھاتے ہوئے یہ بھی کہا کہ ’’گزشتہ برس حکومت نے مرکزی اہلکاروں کو مہنگائی بھتہ روکنے کا عجیب و غریب فیصلہ کیا، جس سے ایک کروڑ سے زائد مرکزی اہلکار متاثر ہوئے ہیں۔ ان میں 15 لاکھ فوجی اور 26 لاکھ سے زیادہ فوج سے متعلق ریٹائرڈ پنشن ہولڈرس ہیں۔‘‘

کانگریس ترجمان نے پریس کانفرنس سے خطاب کرتے ہوئے کہا کہ حکومت کو اہلکاروں کے مفاد کا خیال رکھتے ہوئے انھیں مہنگائی بھتے کی بقایہ رقم کی ادائیگی کرنی چاہیے، کیونکہ اس کو روکنے کے فیصلے سے 115 لاکھ اہلکاروں کے ساتھ ہی ان پر منحصر آٹھ کروڑ سے زیادہ ان کے اہل خانہ بھی متاثر ہوئے ہیں۔ ابھشیک منو سنگھوی نے مزید کہا کہ ’’ملک میں کورونا وبا جب قہر برپا کر رہی تھی اور ملک کا ہر خاندان اس سے متاثر تھا تو مودی حکومت نے دوہرا معیار اختیار کرتے ہوئے سب سے پہلے مرکزی اہلکاروں کے حق پر حملہ کر کے ان کے مہنگائی بھتے کی ادائیگی روکی ہے۔‘‘