مودی حکومت کانیا نعرہ’کھاؤں گا اورکھانے دوں گا،پیک کرکے لے جانے دوں گا‘:کانگریس

کانگریس نے ایک بار پھر بینک گھوٹالوں پر مودی حکومت کو نشانہ بنایا ہے۔ کانگریس ترجمان رندیپ سرجے والا نے آج پریس کانفرنس کر کے مرکزی حکومت پر طنز کے تیر بھی برسائے۔ انھوں نے کہا کہ ’’لگتا ہے حکومت کا نیا نعرہ ہو گیا ہے کہ- کھاؤں گا اور کھانے دوں گا اور پیک کر کے لے جانے بھی دوں گا۔‘‘

رندیپ سرجے والا نے بینکنگ گھوٹالے سے متعلق کئی دستاویز بھی پیش کیے۔ ساتھ ہی انھوں نے کئی کمپنیوں کی بیلنس شیٹ کے بارے میں بھی تفصیل سے میڈیا کے سامنے اعداد و شمار رکھے۔ انھوں نے دعویٰ کیا کہ اس طرح کا گھوٹالہ کافی وقت سے چل رہا تھا لیکن حکومت نے اسے روکنے کے لیے کچھ نہیں کیا۔

کانگریس ترجمان نے جتن مہتا معاملے کا بھی پریس کانفرنس میں تذکرہ کیا۔ انھوں نے کہا کہ ’’جتن مہتا اور ان کی بیگم بہت آسانی سے ملک چھوڑ کر بھاگ گئے۔ 2 جون 2016 کو ہندوستانی شہریت چھوڑنے کے بعد کیربیائی ملک ’سنٹ کٹس اینڈ نیوس‘ میں جا کر بس گئے جس کے ساتھ حکومت ہند کا سپردگی سے متعلق کوئی معاہدہ ہی نہیں ہے۔‘‘