گرمیت رام رحیم کے پیرول سے ناراض کانگریس پہنچی الیکشن کمیشن، حکم فوراً رد کرنے کا مطالبہ

ہریانہ اسمبلی انتخاب سے عین قبل عصمت دری اور قتل جیسے سنگین جرم میں سزایافتہ ڈیرا سچا سودا چیف گرمیت رام رحیم کو پیرول پر رہائی مل گئی ہے۔ اس پیرول کے خلاف کانگریس نے الیکشن کمیشن کا دروازہ کھٹکھٹایا ہے۔ کانگریس نے الیکشن کمیشن سے رام رحیم کی پیرول فوراً رد کرنے کا مطالبہ کیا ہے۔

کانگریس نے الیکشن کمیشن کو لکھے خط میں اس بات کا اندیشہ ظاہر کیا ہے کہ گرمیت رام رحیم ہریانہ کے انتخابی دنگل میں ووٹرس کو متاثر کر سکتا ہے۔ کانگریس نے الیکشن کمیشن سے مطالبہ کیا ہے کہ رام رحیم کی پیرول فوراً رد کی جائے۔ کانگریس نے اپنے خط میں کہا ہے کہ گرمیت رام رحیم کو ایسے وقت میں پیرول ملی ہے جب ہریانہ اسمبلی انتخاب میں کچھ ہی دن باقی رہ گئے ہیں۔ ہریانہ میں اس کے فالوورس بڑی تعداد میں ہیں۔ ایسے میں اس بات کا قوی امکان ہے کہ وہ ریاست کی سیاست کو متاثر کر سکتا ہے۔

واضح رہے کہ ایک ماہ کے اندر رام رحیم کو دوسری مرتبہ مشروط پیرول ملی ہے۔ جاری حکم میں کہا گیا ہے کہ پیرول کے دوران وہ نہ ہی کسی طرح کے سیاسی اجلاس میں شرکت کر سکے گا اور نہ ہی کسی لیڈر سے ملاقات کرے گا۔ اسے کہا گیا ہے کہ اگر وہ ان دونوں میں سے کچھ بھی کرتا ہوا پایا گیا تو اس کی پیرول رد کر دی جائے گی۔ امکان ظاہر کیا جا رہا ہے کہ کل یعنی بدھ کے روز وہ جیل سے باہر آ سکتا ہے۔

پیرول کے دوران گرمیت رام رحیم اتر پردیش کے باغپت واقع بروانا آشرم میں رہے گا۔ عصمت دری اور قتل جیسے سنگین معاملوں میں سزا کاٹ رہے رام رحیم کو چار سال میں 11 مرتبہ پیرول مل چکی ہے۔ وہ روہتک ضلع کی سناریا جیل میں بند ہے۔ 21 دنوں کی پیرول کاٹ کر اس نے 2 ستمبر کو ہی خود سپردگی کی تھی۔ رام رحیم کے بارے میں اب کئی لوگ طنز کستے ہوئے کہتے ہیں کہ اسے سزا نہیں بلکہ پیرول ملی ہے۔