ہریانہ اسمبلی انتخابات: کسانوں اور خواتین کے لیے کانگریس کی ضمانتیں، ہر ماہ 2 ہزار روپے اور دو کمرے کا مکان

نئی دہلی: ہریانہ اسمبلی انتخابات کے لیے کانگریس نے آج اپنے گارنٹی کارڈ کا اعلان کیا ہے جس میں عوام کو مختلف فلاحی اسکیموں کی یقین دہانی کرائی گئی ہے۔ کانگریس صدر ملکارجن کھڑگے نے بدھ کے روز پارٹی کی طرف سے سات اہم ضمانتوں کا اعلان کیا۔ ان میں سے کئی اسکیمیں خواتین، بزرگوں، اور کمزور طبقے کے لوگوں کے لیے مخصوص ہیں۔

دہلی میں اے آئی سی سی کے ہیڈکوارٹر میں ہریانہ اسمبلی انتخابات کے لیے پارٹی کے منشور کے حصے کے طور پر گارنٹی کارڈ جاری کیا گیا۔ اس موقع پر کانگریس صدر ملکارجن کھڑگے، کانگریس کے جنرل سکریٹری کے سی وینوگوپال، ہریانہ کے سابق وزیر اعلیٰ بھوپندر سنگھ ہڈا، اور ہریانہ کانگریس کے صدر اودے بھان بھی موجود تھے۔

کانگریس نے اعلان کیا ہے کہ اگر ریاست میں ان کی حکومت بن جاتی ہے تو خط افلاس سے نیچے زندگی گزارنے والے افراد کو دو کمرے کا مکان فراہم کیا جائے گا۔ اس کے علاوہ، خواتین کو ہر ماہ 2 ہزار روپے کی مالی مدد فراہم کی جائے گی۔ یہ رقم 18 سال سے 60 سال کی عمر کی خواتین کو دی جائے گی، جس کا مقصد خواتین کو اقتصادی طور پر خود مختار بنانا ہے۔

کانگریس کے رہنما دیپک باوریا نے کہا کہ بھارتیہ جنتا پارٹی (بی جے پی) کے دور حکومت میں ہرینانا میں جرائم کی شرح میں اضافہ ہوا ہے۔ اس صورتحال کو مدنظر رکھتے ہوئے، خواتین کی خود مختاری کے لیے ہر ماہ 2 ہزار روپے دینے کا وعدہ کیا گیا ہے۔ مہنگائی کی چکی میں پسنے والوں کے لیے، کانگریس نے 500 روپے میں گیس سلنڈر فراہم کرنے کا وعدہ کیا ہے۔

بزرگوں، معذور افراد، اور بیواؤں کو 6 ہزار روپے ماہانہ پینشن فراہم کی جائے گی۔ ریٹائرڈ ملازمین کے لیے پرانی پینشن اسکیم (او پی ایس) کو دوبارہ نافذ کیا جائے گا، جس سے ان کی زندگی آسان ہو جائے گی۔ نوجوانوں کے لیے، کانگریس نے 2 لاکھ خالی عہدوں پر بھرتی کرنے اور ہرینانا کو نشہ سے پاک کرنے کا وعدہ کیا ہے۔ 300 یونٹس تک مفت بجلی فراہم کی جائے گی۔

کانگریس نے مزید اعلان کیا ہے کہ 25 لاکھ روپے تک مفت طبی علاج فراہم کیا جائے گا۔ 100 گز کا پلاٹ فراہم کیا جائے گا اور 3.5 لاکھ روپے کی قیمت کے دو کمرے کا مکان دیا جائے گا۔

ہریانہ کے لیے کانگریس کی 7 ضمانتیں:

1. 300 یونٹس تک مفت بجلی اور 25 لاکھ روپے تک مفت طبی علاج فراہم کیا جائے گا۔

2. خواتین کو ہر ماہ 2 ہزار روپے دیے جائیں گے اور 500 روپے میں گیس سلنڈر فراہم کیا جائے گا۔

3. دو لاکھ خالی اسامیوں پر بھرتی کی جائے گی اور ہریانہ کو نشہ سے پاک بنانے کے لیے خصوصی اقدام اٹھایا جائے گا۔

4. بزرگوں، معذور افراد اور بیواؤں کو 6 ہزار روپے ماہانہ پنشن دی جائے گی اور پرانی پنشن اسکیم (او پی ایس) کو بحال کیا جائے گا۔

5. ذات پر مبنی مردم شماری کروائی جائے گی اور کریمی لیئر کی حد 10 لاکھ روپے تک بڑھائی جائے گی۔

6. کم از کم سپورٹ قیمت (ایم ایس پی) کی قانونی ضمانت دی جائے گی اور نقصان کی صورت میں فصلوں کا معاوضہ فوری طور پر فراہم کیا جائے گا۔

7. غریبوں کے لیے 100 گز کے پلاٹ فراہم کیے جائیں گے اور 3.5 لاکھ روپے کی قیمت کے دو کمروں کا مکان فراہم کیا جائے گا۔