چین-یورپ میں کورونا دھماکے سے ہندوستان میں تشویش! وزیر صحت کا اعلیٰ سطحی اجلاس طلب، نئی رہنما ہدایات کا نفاذ متوقع

نئی دہلی: چین اور یورپ میں کورونا کا زبردست دھماکہ ہوا ہے اور چین میں حالات بے قابو ہو چکے ہیں۔ ہر روز ریکارڈ اموات کے سبب لوگوں کو اپنے مردوں کی آخری رسومات ادا کرنے کے لئے بھی انتظار کرنا پڑ رہا ہے۔ دریں اثنا، یہ سب دیکھ کر ہندوستان بھی احتیاط برت رہا ہے۔ مرکزی وزیر صحت منسکھ مانڈویہ نے اعلیٰ سطحی اجلاس طلب کر لیا ہے۔

اجلاس میں بین الاقوامی اور ملکی ہوائی اڈوں پر حفاظتی اقدامات، بیرون ملک سے آنے والے مسافروں کے لیے اصولوں کا تعین جیسے کئی نکات پر غور کیا جائے گا۔ قبل ازیں، ہیلتھ سکریٹری راجیش بھوشن نے این سی ڈی سی اور آئی سی ایم آر کو ایک خط لکھا ہے، جس میں کہا گیا ہے کہ تمام ریاستوں کو ’جینوم سیکونسنگ‘ پر زور دینا ہوگا۔

اگرچہ ہندوستان میں اس وقت کورونا کے زیادہ کیسز نہیں ہیں اور اس سے ہونے والی اموات بھی نہ کے برابر ہو رہی ہیں۔ تاہم پوری دنیا میں اس وائرس کے پھیلاؤ کی رفتار کے پیش نظر، حکومت ایک مرتبہ پھر متحرک ہو گئی ہے۔ یہی وجہ ہے کہ ہیلتھ سکریٹری راجیش بھوشن نے این سی ڈی سی اور آئی سی ایم آڑ کو ایک خط لکھا ہے، جس میں کہا گیا ہے کہ اگر وقت پر کورونا کی نئی شکلوں کی شناخت کرنی ہے تو اس کے لیے جینوم سیکونسنگ ضروری ہے۔ انہوں نے ریاستوں کو جینوم سیکونسنگ کے لیے نمونے بھیجنے کی بھی ہدایت دی ہے۔

خیال رہے کہ کہ چین میں کورونا کی صورتحال مزید دھماکہ خیز ہو گئی ہے اور وہاں کی حکومت کی جانب سے حال ہی میں شدید احتجاج کے باعث زیرو کووڈ پالیسی میں نرمی کے بعد اب ملک میں کورونا کے ریکارڈ کیسز سامنے آ رہے ہیں۔ صورتحال یہ ہے کہ اسپتال میں مریضوں کے لیے بستر نہیں ہیں، لاشوں کی آخری رسومات ادا نہیں ہو پا رہی ہیں اور کئی مریضوں کو ضروری ادویات بھی میسر نہیں ہیں۔