دہلی میں موسم کی سب سے سرد رات، درجہ حرارت 14.3 ڈگری سیلسیس، اے کیو آئی انتہائی خراب

نئی دہلی: قومی راجدھانی دہلی میں ہفتہ کو اس موسم کی سرد ترین رات ریکارڈ کی گئی۔ سٹینڈرڈ آبزرویٹری صفدرجنگ، جو شہر کا بیس اسٹیشن ہے، یہاں کم از کم درجہ حرارت معمول سے دو ڈگری کم یعنی 14.3 ڈگری سیلسیس تک گر گیا۔ اس سیزن میں یہ پہلا موقع ہے جب صفدر جنگ میں کم سے کم درجہ حرارت 15 ڈگری سیلسیس سے نیچے ریکارڈ کیا گیا ہے۔

دہلی میں سردی میں اضافہ کے ساتھ ہی فضائی آلودگی میں بھی اضافہ درج کیا جا رہا ہے۔ رپورٹ کے مطابق دہلی میں ہفتہ کو ہوا کا اوسط معیار انتہائی خراب زمرے میں (304) ریکارڈ کیا گیا۔ 22 اکتوبر 2023 کو دارالحکومت میں اے کیو آئی 313 کے ساتھ انتہائی خراب درج کیا گیا تھا۔ جبکہ 21 اکتوبر کو یہ 261 تھا۔ اگلے دو دنوں تک دہلی میں آلودگی کی صورتحال بہت خراب رہے گی۔ حکام کے مطابق یہ آلودگی پُرسکون ہوا کے حالات، کم درجہ حرارت اور کم مکسنگ تہہ کی اونچائی کی وجہ سے جمع ہوئی ہے۔

اتوار کو دہلی میں سب سے زیادہ ہوا کے معیار کا انڈیکس جہانگیر پوری میں 409 یعنی 'شدید' یا خطرناک زمرے میں ریکارڈ کیا گیا۔ 22 اکتوبر کو دہلی کی ہوا اس سیزن میں پہلی بار 313 اے کیو آئی کے ساتھ بہت خراب ہو گئی۔ آلودگی کی سطح کے پیش نظر اس کے بعد سے دہلی میں جی آر اے پی-ٹو لاگو کیا گیا ہے۔ تازہ ترین اپ ڈیٹ یہ ہے کہ 31 اکتوبر تک ہوا کا معیار 'بہت خراب' رہنے کا امکان ہے۔ اگلے دو روز تک رات کا درجہ حرارت 16 ڈگری سینٹی گریڈ رہنے کا امکان ہے۔ انڈین ایگریکلچرل ریسرچ انسٹی ٹیوٹ کے مرتب کردہ سیٹلائٹ ڈیٹا کے مطابق، شمال مغربی ہندوستان کی ریاستوں میں پرالی جلانے کے واقعات سامنے آنے لگے ہیں۔

سفر انڈیا کے تازہ ترین اعداد و شمار کے مطابق دہلی میں ہوا کے معیار کا اوسط انڈیکس 309 ریکارڈ کیا گیا، جسے بہت خراب سمجھا جاتا ہے۔ نوئیڈا میں بھی ہوا کا معیار 372 اے کیو آئی کے ساتھ 'انتہائی خراب' زمرے میں ہے۔ ساتھ ہی، گروگرام میں ہوا کا معیار 221 اے کیو آئی کے ساتھ 'خراب' زمرے میں ہے۔ مرکزی آلودگی کنٹرول بورڈ کے مطابق آئندہ چند دنوں میں آلودگی کی سطح میں بہتری کی بہت کم گنجائش ہے۔ اتوار کو موسم ابر آلود رہنے کی پیش گوئی ہے۔