دیوالی پر سی ایم بگھیل کا تحفہ، کانگریس حکومت آنے پر خواتین کو ملیں گے 15 ہزار روپے

رائے پور: چھتیس گڑھ کے وزیر اعلی بھوپیش بگھیل نے دیوالی کے دن خواتین کے لیے اہم اعلان کرتے ہوئے کہا کہ چھتیس گڑھ میں کانگریس حکومت برقرار رہی تو 'چھتیس گڑھ گریہ لکشمی یوجنا' شروع کی جائے گی، جس کے تحت خواتین کے کھاتوں میں ہر سال 15 ہزار روپے دئیے جائیں گے۔ اس سے قبل بھارتیہ جنتا پارٹی (بی جے پی) نے بھی اپنے منشور میں خواتین کو 12000 روپے دینے کا وعدہ کیا تھا۔

بگھیل نے سوشل میڈیا پلیٹ فارم پر پوسٹ کیا، ’’چھتیس گڑھ گریہ لکشمی یوجنا، خواتین کے کھاتوں میں ہر سال 15 ہزار روپے۔ نہ فارم بھریں، نہ لائن میں لگیں۔‘‘ انہوں نے کہا، ’’آج میری ماؤ بہنو! آج دیواری (دیوالی) کے مبارک موقع پر لکشمی دیوی چھتیس گڑھ کو بے پناہ نعمتوں سے نوازے۔ ہماری حکومت نے پانچ سال اس عزم کے ساتھ کام کیا ہے کہ میرا چھتیس گڑھ امیر ہو اور ہم غریبی کی لعنت کو مٹا سکیں۔ آج دیوالی کے مبارک دن پر، ہم اپنی ماؤں اور بہنوں کو مزید خوشحال اور قابل دیکھنا چاہتے ہیں۔ لہذا، آج اس مبارک موقع پر، میں اعلان کرتا ہوں کہ آپ کانگریس کو ووٹ دیں، چھتیس گڑھ میں کانگریس کی حکومت بنائیں، ہم 'چھتیس گڑھ گریہ لکشمی یوجنا' شروع کریں گے، جس کے تحت ہم ہر خاتون کو 15000 روپے سالانہ دیں گے۔‘‘

بگھیل نے کہا، "میں تمام ماؤں اور بہنوں سے کہنا چاہتا ہوں کہ آپ کو کہیں بھی لائن میں کھڑے ہونے کی ضرورت نہیں ہے اور نہ ہی آپ کو کوئی فارم بھرنے کی ضرورت ہے۔ حکومت آپ کا خود سروے کرے گی۔ سب کچھ آن لائن ہوگا اور پیسہ آئے گا۔ براہ راست آپ کے اکاؤنٹ میں۔

چھتیس گڑھ میں وزیر اعلی بھوپیش بگھیل کے اس اعلان کو بی جے پی کی 'مہتاری وندن یوجنا' کا جواب سمجھا جا رہا ہے۔ اس اسکیم کے تحت بی جے پی نے وعدہ کیا ہے کہ اگر چھتیس گڑھ میں بی جے پی کی حکومت بنتی ہے تو ہر شادی شدہ خواتین کے کھاتوں میں سالانہ 12000 روپے جمع کیے جائیں گے۔