اندرا گاندھی کے ذاتی سکریٹری رہے آر کے دھون کا انتقال، راہل کا اظہار غم

کانگریس کے سینئر رہنما آر کے دھون کا گزشتہ شب انتقال ہو گیا، وہ 81 سال کے تھے۔ پیر کے روز انہوں نے دیلی کے بی ایل کپور اسپتال میں آخری سانس لی۔

راجیہ سبھا کے رکن پارلیمنٹ رہ چکے سینئر رہنما آر کے دھون سابق وزیر اعظم اندرا گاندھی کے ذاتی سکریٹری رہ چکے تھے۔ سنہ 1984 میں جس وقت اندرا گاندھی کا قتل کیا گیا تھا اس وقت آر کے دھون جائے وقوعہ پر موجود تھے اور وہ قتل کے چشم دیدوں میں سے ایک تھے۔ دھون کے انتقال پر کانگریس نے غم کا اظہار کیا ہے۔

کانگریس صدر راہل گاندھی نے کانگریس کے سینئر لیڈر آر کے دھون کے انتقال پر گہرے رنج وغم کا اظہار کیا ہے۔ راہل گاندھی نے اپنے تعزیتی پیغام میں کہا ’’آر کے دھون جی، جنہیں میں بچپن سے جانتا تھا، ان کے اچانک اس طرح چلے جانے سے کانگریس خاندان کو ناقابل تلافی نقصان ہوا ہے۔ وہ کانگریس کے ایک اہم اور سینئر رکن تھے جنہیں پارٹی میں سبھی محبت کرتے تھے اور احترام اور عزت دیتے تھے. ان کے دوستوں اور وارثین سےمیری دلی تعزیت۔‘‘

آر کے دھون کے انتقال پر کانگریس کے ترجمان رندیپ سنگھ سرجے والا نے بھی رنج و غم کا اظہار کیا۔ انہوں نے ٹوئٹر پر لکھا ’’کانگریس کے سینئر رہنما آر کے دھون کو خراج تحسین، جنہوں نے آج اپنی آخری سانس لی۔ کانگریس اقدار کے تئیں ان کے جذبات، عزم اور لگن کو ہمیشہ یاد کیا جائے گا۔ خدا ان کی روح کو سکون بخشے۔‘‘

آر کے دھون نے ابتدائی تعلیم دہرادون میں حاصل کی، اس کے بعد وہ بنارس ہندو یونیورسٹی (بی ایچ یو) میں داخل ہوئے۔ انہوں نے کافی دیر سے شادی کی۔ وہ اکثر کہا کرتے تھے کہ وہ کانگریس اور گاندھی خاندان کے سچے خدمت گار ہیں، اس لئے انہوں نے خلوص کے ساتھ اس کی خدمت میں پوری زندگی گزارنے کا فیصلہ کیا ہے۔